6 ліпеня, Позірк. На пажары ў аздараўленчым лагеры ў Маладзечанскім раёне (Мінская вобласць) 6 ліпеня пацярпела тры чалавекі з ліку персаналу ўстановы, паведамляе Міністэрства па надзвычайных сітуацыях.
Паводле даных ведамства, яны атруціліся прадуктамі гарэння, спрабуючы ўласнымі сіламі тушыць узгаранне. Пасля агляду медыкамі пацярпелых шпіталізавалі з адпаведным дыягназам.
Інфармацыя пра пажар у дзіцячым лагеры з’явілася каля 17:00, тады прэс-служба МНС паведаміла, што ніхто не пацярпеў.
Паводле звестак ведамства, у спальным корпусе гарэла маёмасць. Узгаранне ліквідавалі пажарныя, эвакуацыю ж правёў персанал лагера. Пасля гукавога апавяшчэння работнікі лагера вывелі 132 чалавекі, у тым ліку 120 дзяцей.
