У РФ узбуджана крымінальная справа па факце хакерскай атакі на “Аэрафлот”, да якой маюць дачыненне “Кіберпартызаны”

28 ліпеня, Позірк. Маскоўская міжрэгіянальная транспартная пракуратура (РФ) па даручэнні Генпракуратуры Расіі “ўзяла на кантроль” сітуацыю ў аэрапорце Шарамеццева, дзе затрымана звыш 80 і адменена каля 60 рэйсаў, паведамляе расійскае нагляднае ведамства.

Там таксама пацвердзілі, што прычынай стаў збой у інфармацыйнай сістэме кампаніі “Аэрафлот” у выніку хакерскай атакі. Узбуджаная крымінальная справа “паводле прыкмет злачынства, прадугледжанага ч. 4 арт. 272 КК РФ (неправамерны доступ да кампутарнай інфармацыі)”.

Раней у гэты дзень ананімная хакерская групоўка “Silent Crow” (зав. “Ціхі крумкач”) заявіла аб паспяховым правядзенні “працяглай і маштабнай аперацыі, у выніку якой была цалкам скампраметаваная і знішчаная ўнутраная ІТ-інфраструктура кампаніі “Аэрафлот” — сумесна з беларускімі “Кіберпартызанамі”.

“Кіберпартызаны”, у сваю чаргу, праз некалькі гадзін пацвердзілі ў сваім тэлеграм-канале інфармацыю аб удзеле ў атацы, паведаміўшы, што “паспяховае пранікненне шмат у чым стала магчыма дзякуючы таму, што некаторыя супрацоўнікі кампаніі грэбуюць элементарнай бяспекай пароляў”. “Так гендырэктар “Аэрафлота” Сяргей Аляксандроўскі не мяняў пароль аж з 2022 года”, — сцвярджаюць хакеры.

“Кібератака на карпаратыўную сетку “Аэрафлота” пачалася ў ноч з 27 на 28 ліпеня. Да раніцы мы знішчылі звыш 7 тыс. сервераў і працоўных станцый, базы дадзеных і ўнутраныя сістэмы”, — гаворыцца ў рэлізе.

“Мы працягнем атакі па агрэсарах, пакуль рэжым РФ складае прамую пагрозу для тэрытарыяльнай цэласнасці і незалежнасці Беларусі і Украіны. Лёс “Аэрафлота” можа падзяліць кожнае прадпрыемства або арганізацыя на тэрыторыі РФ і РБ, якія працуюць на дыктатуру Крамля”, — заявілі “Кіберпартызаны”.

Раніцай 28 ліпеня “Аэрафлот” паведаміў аб адмене дзясяткаў рэйсаў “у сувязі са збоем інфармацыйных сістэм”. Сярод адмененых рэйсаў былі пераважныя ўнутраныя, а таксама рэйсы ў Мінск.