У бальніцы памёр трэці пацярпелы ад удару токам у Рэчыцкім раёне — СМІ

28 ліпеня, Позірк. Раніцай 28 ліпеня ў бальніцы памёр 22-гадовы мужчына, напярэдадні пацярпелы пры ўдары токам у Рэчыцкім раёне (Гомельская вобласць), паведамляе рэгіянальнае медыя “Флагшток”.

27 ліпеня Следчы камітэт паведаміў, што двое мужчын (43 і 25 гадоў) загінулі ад удару токам, калі разам са шпіталізаваным пасля калегам “ажыццяўлялі перавешванне сейсмічнага кабеля праз аўтадарогу М-10”. Адзначалася, што падчас работ “яны закранулі металічным абсталяваннем лінію электраперадач”.

“На месцы здарэння працуе следча-аператыўная група. Следчым з прыцягненнем спецыялістаў упраўлення Дзяржаўнага камітэта судовых экспертыз па Гомельскай вобласці і Дэпартамента дзяржаўнай інспекцыі працы праводзіцца агляд месца здарэння, фіксуецца следавая карціна. Апытваюцца відавочцы, плануецца прызначэнне шэрагу экспертных даследаванняў”, — гаварылася ў паведамленні.

Абставіны здарэння будуць устаноўленыя падчас праверкі, “асаблівая ўвага будзе нададзеная прычынам і ўмовам, якія спрыялі трагедыі”, заяўляў СК.

Ведамства не паведаміла месца працы пацярпелых і абставіны “перавешвання кабеля”.

“Флагшток” са спасылкай на “крыніцу” адзначае, што загінулыя былі супрацоўнікамі РУП ВА “Беларуснафта”, працавалі ва ўпраўленні палявых сейсмаразведачных работ (УПСР) аб’яднання ўсяго некалькі месяцаў, хоць “у нармальнай практыцы брыгады, якія займаюцца пракладкай геафізічнага кабеля, камплектуюцца пераважна дасведчанымі рабочымі”.

Таксама выданне ўказвае, што рызыка трагедыі магла быць павышаная праз тое, што адбыўся “пераход з драўляных на часовыя металічныя апоры геафізічнага кабеля”.

Акрамя таго, паводле інфармацыі медыя, “праблемы з кадрамі ва УПСР пачаліся не ўчора”. “Пасля 2020 года з упраўлення звольнілі ці не працягнулі кантракты з дзясяткамі спецыялістаў. У базе асуджаных па палітычных справах знаходзяцца як мінімум шэсць супрацоўнікаў УПСР — чатыры інжынеры і двое рабочых”, — гаворыцца ў публікацыі.