Фрыдман: Тое, што Трамп першай тэмай падняў вызваленне палітвязняў, выклікае некаторы аптымізм
Аляксандр Фрыдман
15 жніўня, Позірк. Тое, што прэзідэнт ЗША Дональд Трамп у тэлефоннай размове з Аляксандрам Лукашэнкам першай тэмай падняў вызваленне палітвязняў, выклікае некаторы аптымізм, заявіў у экспрэс-каментары “Позірку“ палітычны аналітык Аляксандр Фрыдман.
“Калі ўзяць практыку папярэдніх кантактаў, то кожны раз пасля таго, як амерыканцы нешта рабілі з Аляксандрам Лукашэнкам, некаторыя палітвязні выходзілі на волю. Можа, не адразу. А можа быць, хто яго ведае, ужо сёння ўвечары ці заўтра раніцай мы даведаемся пазітыўныя навіны пра палітвязняў”, — адзначыў эксперт.
Гаворачы пра размову агулам, Фрыдман падкрэсліў, што для Лукашэнкі гэта — “велізарны прапагандысцкі поспех”: “Прапаганда цяпер будзе падкрэсліваць у кантэксце гэтых перамоваў, якая Лукашэнка важная персона сусветнага значэння. Зрэшты, уласна кажучы, яна гэтым і займаецца”.
Тое, што Трамп назваў яго “глыбокапаважаным прэзідэнтам”, і тое, што нібыта кіраўнік Белага дома пагадзіўся прыехаць са сваёй сям’ёй у Беларусь — гэта “незалежна ад сітуацыі таксама сур’ёзны прапагандысцкі поспех, які яны будуць раскручваць”.
“Чаму прэзідэнт ЗША наогул вырашыў патэлефанаваць? Можна толькі рабіць адны здагадкі. Вядома, гэта звязана з яго сустрэчай на Алясцы з [прэзідэнтам РФ Уладзімірам] Пуціным. У прынцыпе, калі зыходзіць з версіі, якую выкладаў [журналіст амерыканскага часопіса Times] Сайман Шустэр (нядаўна браў у беларускага кіраўніка інтэрв’ю. — “Позірк”.), пра тое, што Лукашэнка ўдзельнічаў у распрацоўцы гэтай сустрэчы і быў кшталту шаптуном. А таксама, што як чалавек, блізкі да Пуціна, валодае нейкімі інсайдамі, тое, каб падрыхтавацца да такога кшталту размовы з Пуціным, можна, пагаварыць і з Лукашэнкам“, — мяркуе аналітык.
