На сустрэчы з Сі Цзіньпінам Лукашэнка выказаў жаданне “нешта пераняць” у палітычным ладзе Кітая

31 жніўня, Позірк. “Каласальныя змены” ў Кітаі “літаральна за паўгода-год” адзначыў на сустрэчы са старшынёй КНР Сі Цзіньпінам 31 жніўня ў Цяньцзіні Аляксандр Лукашэнка.

“Вы проста малайцы — гіганцкае развіццё Кітайскай Народнай Рэспублікі! Арганізацыя, дысцыпліна, усё па месцы, ніхто дарма нідзе не ходзіць. Людзі займаюцца канкрэтнай справай. Я ў гэтым бачу вялікі поспех вашай дзяржавы і вялікі поспех вашага кіраўніцтва, вашых калег у Кітаі. Усе астатнія пытанні проста цьмянеюць перад тым, што вы робіце ў Кітайскай Народнай Рэспубліцы”, — цытуе Лукашэнку яго прэс-служба.

Сярод іншага ён звярнуў увагу на тэхналагічнае развіццё Кітая: “Я памятаю, мы перадавалі пэўныя тэхналогіі КНР, а цяпер мы вучымся ў вас цалкам па ўсіх напрамках. Ад ваенна-прамысловага комплексу да тавараў народнага спажывання”.

“Таму вось такія добрыя ўражанні адводзяць на другі план усё, пра што ты думаеш глабальным. А вы робіце глабальнае з простага. Я вас віншую”, — дадаў Лукашэнка.

“Асабіста я ўжо прыйшоў да таго, што і ў палітычным ладзе дзяржавы мы павінны ў вас нешта пераняць. Калісьці Савецкі Саюз і Кітай вельмі дружна выбудоўвалі тую мадэль, якую вы цяпер не страцілі, якая ў вас дзейнічае пры арганізацыі і кіраўніцтве Кітайскай Народнай Рэспублікай. Мы, на жаль, шмат чаго страцілі. І сёння ўжо той, хто над гэтым думае сур’ёзна, разумее, што мы вельмі многае страцілі”, — адзначыў прамоўца.

Ён таксама павіншаваў Сі Цзіньпіна з тым, што той “па-кітайску мудра, акуратна, без рэвалюцый і ўзрушэнняў” вядзе Кітай “да той мэты, якую <…> вызначылі”.

Беларусь павінна развівацца“ ціха, спакойна, без усялякіх рыўкоў, без рэвалюцый, эвалюцыйна”, заявіў Лукашэнка ў інтэрв’ю Медыякарпарацыі Кітая (China Media Group, дадзена 22 жніўня).

“Я хачу, каб новы прэзідэнт, які прыйдзе пасля мяне, нічога не ламаў. Спакойна, па-кітайску, вытрымана ацаніў усё і павёў сваю краіну, беларускае грамадства туды, куды трэба“, — сказаў палітык.

Лукашэнка наведвае Кітай з 31 жніўня да 3 верасня, ён возьме ўдзел у саміце Шанхайскай арганізацыі супрацоўніцтва (ШАС) і ў саміце ў фармаце “ШАС плюс” з кіраўнікамі дзяржаў-назіральнікаў, міжнародных арганізацый, “высокіх гасцей”.

3 верасня ў Пекіне ён возьме ўдзел у мерапрыемствах, прысвечаных “80-годдзю Перамогі над японскім мілітарызмам і заканчэнню Другой сусветнай вайны”, у тым ліку будзе назіраць за парадам, які пройдзе на плошчы Цяньаньмэнь.

Папярэдні раз Лукашэнка наведваў Кітай 2–4 чэрвеня. У рамках візіту адбыліся яго перамовы з Сі Цзіньпінам. На трэці дзень пасля вяртання, 7 чэрвеня, палітык адкрыў у Мінску нацыянальны футбольны стадыён, пабудаваны, паводле сцвярджэння Лукашэнкі, за кошт Кітая ў якасці “падарунка”.

Тыднем пазней Беларусь наведаў намеснік старшыні пастаяннага камітэта 14-га Усекітайскага сходу народных прадстаўнікоў Чжан Цынвэй. У рамках візіту адбылася яго сустрэча з Лукашэнкам.