3 верасня, Позірк. З крытыкай ЗША за тое, што ў ініцыяваны імі працэс вызвалення палітвязняў у Беларусі не ўключаныя краіны ЕС, выступіў член камісіі Сейма Літвы па міжнародных справах Эмануэліс Зінгерыс.
“Калі гэта ідзе над нашымі галовамі — гэта не з’яўляецца найлепшым рашэннем”, — сказаў ён на штогадовым “Эканамічным форуме” ў Карпачы (Польшча) 2 верасня.
Парламентарый падзякаваў Вашынгтону за намаганні па вызваленні палітзняволеных, у прыватнасці, Сяргея Ціханоўскага, аднак дадаў: “Але павінны быць салідарныя кансультацыі, калі ідзе размова пра спадара Лукашэнку, паміж ЗША і саюзнікамі”.
Член Нацыянальнага сходу (ніжняя палата) парламента Францыі Фрэдэрык Пеці ў кантэксце кантактаў прэзідэнта ЗША з Аляксандрам Лукашэнкам заявіў, што “адміністрацыя [Дональда] Трампа не мае паняцця, чым сёння з’яўляецца свет”.
Адзначыўшы, што ЗША — гэта “вялікая дэмакратыя”, Пеці папракнуў Трампа ў адсутнасці культуры пры такіх перамовах.
“Памылкі — гэта тое, што мяне больш за ўсё непакоіць наконт адміністрацыі Трампа”, — дадаў парламентарый.
Іншыя падрабязнасці даступныя падпісчыкам “Позірк+” (калі спасылка не працуе, карыстайцеся, калі ласка, гэтай)
