Лукашэнка ўпаўнаважыў МУС падпісаць канвенцыю ААН супраць кіберзлачыннасці

9 верасня, Позірк. Аляксандр Лукашэнка ўпаўнаважыў Міністэрства ўнутраных спраў падпісаць канвенцыю Арганізацыі Аб’яднаных Нацый супраць кіберзлачыннасці. Адпаведны ўказ № 326 ён падпісаў 9 верасня.

У паведамленні прэс-службы Лукашэнкі прыводзіцца поўная назва згаданага міжнароднага дакумента: “Канвенцыя Арганізацыі Аб’яднаных Нацый супраць кіберзлачыннасці; умацаванне міжнароднага супрацоўніцтва ў барацьбе з пэўнымі злачынствамі, якія здзяйсняюцца з выкарыстаннем інфармацыйна-камунікацыйных сістэм, і ў абмене доказамі ў электроннай форме, што датычацца сур’ёзных злачынстваў”.

Адзначаецца, што канвенцыя прынята 24 снежня 2024 года.

Згодна з арт. 65 канвенцыі яна “пачынае дзеянне на дзевяносты дзень пасля даты здачы на захоўванне саракавой ратыфікацыйнай граматы або дакумента аб прыняцці, зацвярджэнні ці далучэнні”.

У Беларусі адзначана зніжэнне на 18,5% колькасці злачынстваў, якія здзяйсняюцца з дапамогай высокіх тэхналогій (з 10.099 за студзень — чэрвень 2024-га да 8.231 за аналагічны перыяд 2025-га), заявіў 24 ліпеня на прэс-канферэнцыі ў Мінску начальнік упраўлення па наглядзе за аператыўна-вышуковай дзейнасцю і выкананнем законаў у дзейнасці органаў дазнання Генеральнай пракуратуры Сяргей Замара.

Паводле яго слоў, удзельная вага кіберзлачынстваў складае 27%. Сярод іх пераважаюць махлярствы з выкарыстаннем інфармацыйна-камунікацыйных тэхналогій (4.298, або 52%) і крадзяжы, здзейсненыя шляхам мадыфікацыі камп’ютарнай інфармацыі (3,3 тыс.; 40%).