МНС паведаміла аб ліквідацыі пажару ў бабруйскай кавярні

14 верасня, Позірк. Аб ліквідацыі ўзгарання ў кафэ ў Бабруйску (Магілёўская вобласць) паведаміла 14 верасня Міністэрства па надзвычайных сітуацыях.

Аб’ект размешчаны на вуліцы Коўзана, паведамленне аб пажары паступіла ў МНС у 15:13, гаворыцца ў паведамленні.

“На момант узгарання наведвальнікаў у кафэ не было, персанал пакінуў будынак самастойна”, — адзначае ведамства.

На месцы здарэння працавала 9 адзінак тэхнікі МНС, пацярпелых няма.

Прычына пажару высвятляецца.

З аператыўнай зводкі МНС вынікае, што на раніцу 14 верасня ў Беларусі з пачатку года адбылося 4.710 пажараў — на 9,9% больш, чым на аналагічную дату 2024-га (4.285). Загінула 370 чалавек (333; +11,1%).

“Позірк” неаднаразова звяртаў увагу на тое, што МНС перыядычна карэктуе статыстыку смяротнасці на пажарах у бок змяншэння. Падобны прыклад, у прыватнасці, быў зафіксаваны 23 жніўня, калі ведамства паведаміла аб чатырох загінулых за суткі і 355 — з пачатку года, хоць напярэдадні агульная лічба загінулых была 353.