У Кангрэсе ЗША прапануюць падоўжыць стратэгічны дыялог з дэмсіламі Беларусі

16 верасня, Позірк. Працяг штогадовага стратэгічнага дыялогу паміж ЗША і дэмакратычнымі сіламі Беларусі прадугледжаны ўнесеным 11 верасня на разгляд Кангрэса ЗША законапраектам аб палажэннях палітыкі Дзяржаўнага дэпартамента.

Яго аўтарам з’яўляецца кангрэсмен-рэспубліканец ад штата Фларыда Браян Маст.

Раздзел 314 законапраекта ўпаўнаважвае дзяржаўнага сакратара ЗША садзейнічаць правядзенню штогадовага стратэгічнага дыялогу з дэмакратычнымі сіламі Беларусі.

“Стратэгічны дыялог можа быць накіраваны на разгляд мер, неабходных для вяртання да дэмакратычнага кіравання ў Беларусі, уключаючы меры, неабходныя для падтрымкі свабодных і справядлівых выбараў у Беларусі; актыўнае ўзаемадзеянне з беларускім дэмакратычным рухам; рэагаванне на палітычныя, эканамічныя наступствы, а таксама наступствы ў сферы бяспекі падзей у Беларусі і Расійскай Федэрацыі для суседніх краін і краін рэгіёна”, — гаворыцца ў дакуменце.

Заяўляецца, што законапраект будзе садзейнічаць “забеспячэнню адказнасці, у тым ліку шляхам магчымых карных мер у дачыненні да рэжыму Аляксандра Лукашэнкі за парушэнні правоў чалавека, падрыў і падаўленне беларускай грамадзянскай супольнасці і суверэнітэту на карысць Расійскай Федэрацыі, а таксама падтрымку агрэсіўнай вайны РФ ва Украіне”, а таксама “вызваленню палітычных зняволеных і іншых незаконна затрыманых асоб у Беларусі, у тым ліку журналістаў”.

Незалежны амерыканскі сайт govtrack.us ацэньвае верагоднасць прыняцця законапраекта ў 11%, а праходжання яго ў камітэце па міжнародных справах, куды ён быў накіраваны пасля ўнясення — у 32%.

Першы раўнд стратэгічнага дыялогу паміж ЗША і дэмсіламі Беларусі адбыўся ў Вашынгтоне 6–8 снежня 2023 года, другі — у Вільнюсе 3–4 снежня 2024-га.