Двух беларусаў затрымалі ў Польшчы па падазрэнні ў кантрабандзе цыгарэт

30 верасня, Позірк. Пра затрыманне двух беларусаў, якіх падазраюць у кантрабандзе цыгарэт, паведаміла паліцыя Мазавецкага ваяводства (Польшча).

Інцыдэнт адбыўся ўначы 28 верасня. Сігнал у паліцыю паступіў ад мясцовага жыхара, які паведаміў аб выяўленні паветранага шара з прымацаваным грузам.

Недалёка ад названага месца паліцыя затрымала аўтамабіль, у ім знаходзіліся грамадзяне Беларусі 24 і 32 гадоў, якія пражываюць у Варшаве.

“Пры даглядзе пасажыра і аўтамабіля супрацоўнікі паліцыі выявілі сярод іншага прыладу сачэння за паветраным шарам і тэлефон, аб крадзяжы якога было паведамлена ў лістападзе 2024-га”, — гаворыцца рэлізе.

У ходзе агляду было таксама выяўлена 1,5 тыс. пачкаў цыгарэт без польскіх акцызных марак. Кошт кантрабанды ацэньваецца ў 45 тыс. злотых (каля за 12,5 тыс. долараў).

Затрыманым прад’яўленыя абвінавачванні ў нелегальным увозе ў краіну тытунёвых вырабаў.

Раней паведамлялася, што 12 паветраных шароў, выпушчаных кантрабандыстамі з Беларусі, прызямліліся ў памежным Падляскім ваяводстве Польшчы.

Паводле даных польскіх памежнікаў, у гэтых шарах перавозілася каля тысячы блокаў цыгарэт, кошт ацэньваецца прыкладна ў 180 тыс. злотых (каля 48 тыс. долараў).

Паводле інфармацыі паліцыі, у памежнай Сакулцы затрымана некалькі чалавек, уключаючы дваіх беларусаў, усім гэтым людзям прад’яўленыя абвінавачванні ў адпаведнасці з крымінальна-фінансавым заканадаўствам.

З пачатку года Памежная ахова Польшчы канфіскавала 104 паветраныя шары, якія выкарыстоўваліся для кантрабанды, паліцыя — дзясяткі падобных прадметаў.

9 верасня Памежная ахова паведаміла аб канфіскацыі 16 паветраных шароў з кантрабанднымі беларускімі цыгарэтамі.