Беларускія вайскоўцы наведваюць Швейцарыю

2 кастрычніка, Позірк. Вайскоўцы Беларусі наведваюць ваенныя аб’екты Швейцарыі ў рамках Венскага дакумента 2011 года, паведаміў у сацсетцы Х начальнік дэпартамента міжнароднага ваеннага супрацоўніцтва (МВС) — памочнік міністра абароны па пытаннях МВС Валерый Равенка.

“Удзел у мерапрыемстве прадстаўнікоў 28 дзяржаў АБСЕ пацвярджае зацікаўленасць абаронных ведамстваў у захаванні механізмаў супрацоўніцтва, умацавання даверу і бяспекі”, — адзначыў прадстаўнік Мінабароны.

Венскі дакумент АБСЕ — шэраг пагадненняў аб мерах умацавання даверу і бяспекі паміж дзяржавамі Еўропы. Дзейнічае на тэрыторыі ўсёй Еўропы, а таксама прылеглай да яе марской акваторыі і паветранай прасторы.

Швейцарыя, якая не з’яўляецца членам Еўрапейскага саюзу і НАТО традыцыйна далучаецца да санкцый ЕС у дачыненні да Беларусі, за што ўключаная Мінскам у спіс “недружалюбных дзяржаў”.

У той жа час яна з’яўляецца адной з нямногіх еўрапейскіх краін, якая на фоне рэпрэсій у Беларусі даслала ў Мінск дыпламата ўзроўню амбасадара — у 2022 годзе (член Еўрасаюза Венгрыя зрабіла гэта ў 2023-м, Славакія — у 2025-м, кандыдат на ўступленне ў ЕС Сербія — у 2024-м). Неўзабаве пасля ўручэння Крысцінай Хонегер-Залатухін у лютым 2022 года копій даверчых грамат была вызваленая асуджаная паводле палітычных матываў грамадзянка Швейцарыі беларускага паходжання Наталля Хершэ.