Лукашэнка абмеркаваў з Пуціным “сітуацыю ў рэгіёне”

7 кастрычніка, Позірк. Прэс-служба Аляксандра Лукашэнкі паведаміла 7 кастрычніка пра яго тэлефонную размову з прэзідэнтам Расіі Уладзімірам Пуціным.

Як адзначаецца, Лукашэнка зноў павіншаваў Пуціна з днём нараджэння.

Яны абмеркавалі “шэраг пытанняў, што датычацца развіцця беларуска-расійскіх адносін”, а таксама “міжнароднага парадку дня, абстаноўкі ў рэгіёне”.

“Зверылі гадзіннікі ў частцы маючых адбыцца кантактаў — у прыватнасці, на палях саміту СНД у Душанбэ, які адбудзецца на гэтым тыдні”, — гаворыцца ў паведамленні.

Раней 7 кастрычніка Лукашэнка павіншаваў Пуціна з 73-годдзем у паведамленні на сваім сайце. Ён выказаў упэўненасць, што “закладзеныя сумеснымі дзеяннямі асновы адносін саюзніцтва і стратэгічнага партнёрства паміж Беларуссю і Расіяй паслужаць надзейным арыенцірам для будучых пакаленняў грамадзян дзвюх дзяржаў”.

У пасланні віншавальніка сцвярджаецца, што “расійскі народ трывала звязвае” з імем Пуціна “значныя сацыяльныя дасягненні, дынамічнае эканамічнае развіццё, умацаванне дзяржаўнасці і суверэнітэту Айчыны, рост аўтарытэту і ўзмацненне ролі Расіі ў свеце”.

Расійскаму лідару, які вядзе агрэсіўную вайну супраць Украіны і пагражае свету ядзернай зброяй, уласцівыя, на думку Лукашэнкі, “прынцыповасць і мэтанакіраванасць, вернасць абавязку і палітычная мудрасць, выключная адданасць Радзіме і цвёрдая воля ў адстойванні яе нацыянальных інтарэсаў”. Гэтыя якасці, паводле слоў беларускага палітыка, прынеслі Пуціну “ўсенароднае прызнанне ў грамадстве і павагу замежных калег”.

24 лютага 2022 года РФ распачала поўнамаштабную вайну супраць Украіны — найбуйнейшы з часоў Другой сусветнай вайны канфлікт у Еўропе. Рэжым Лукашэнкі прадаставіў арміі РФ тэрыторыю для нападу на суседнюю краіну ўзімку і ўвесну 2022 года, а потым на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў. Паводле звестак расследвальнікаў, многія беларускія прадпрыемствы цяпер актыўна займаюцца вытворчасцю на карысць расійскага ваенна-прамысловага комплексу.

Расійская агрэсія, якую падтрымлівае Лукашэнка, ужо прывяла, паводле розных ацэнак, да сотняў тысяч ахвяр з абодвух бакоў. Еўрасаюз, ЗША і іншыя краіны ўвялі супраць РФ і Беларусі эканамічныя санкцыі.

Апошні раз Пуцін і Лукашэнка сустракаліся ў Маскве 25 верасня. Як заявіў пазней кіраўнік адміністрацыі апошняга Дзмітрый Круты, сярод іншага беларускі палітык скардзіўся Пуціну на “нядобрасумленную канкурэнцыю на рынку прамысловых тавараў і машынабудаўнічай прадукцыі”.

Згаданы саміт СНД пройдзе ў Душанбэ 9–10 кастрычніка з удзелам кіраўнікоў дзяржаў садружнасці.