Вярхоўны суд Беларусі прызнаў “экстрэмісцкай” літоўскую арганізацыю

28 кастрычніка, Позірк. Літоўская арганізацыя Gero kaimyno agentūra, VšĮ (“Агенцтва добрасуседства”) прызнана “экстрэмісцкай” Вярхоўным судом Беларусі 20 кастрычніка, вынікае з абноўленага пераліку згаданых арганізацый на сайце МУС.

Паводле інфармацыі праваабарончага цэнтра “Вясна”, прызнанне Gero kaimyno agentūra, VšĮ “экстрэмісцкай арганізацыяй” звязана з пераследам людзей па справе “дваровых чатаў” — яна мае дачыненне да “экстрэмісцкага фарміравання” “Ордэн”, куды ўваходзіць шэраг такіх чатаў.

Са звестак у літоўскім публічным рэестры вынікае, што грамадская арганізацыя была зарэгістраваная ў Вільнюсе 13 кастрычніка 2022 года, ёй кіруе адна замежная фізічная асоба. Арганізацыя займаецца юрыдычнай дзейнасцю.

У цяперашні час у адпаведным спісе на сайце МУС 316 “экстрэмісцкіх” арганізацый.