Ціханоўская: У дэмакратыі ёсць інструменты, каб спыніць дыктатараў і войны

29 кастрычніка, Позірк. У дэмакратыі ёсць інструменты, каб спыніць дыктатараў і войны, аднак, магчыма, для гэтага “патрэбна смеласць, адвага, не толькі размовы, але і дзеянні”, заявіла на Парыжскім форуме міру 29 кастрычніка дэмакратычны лідар Святлана Ціханоўская.

Дэмлідар была спікерам на панэлі “Вяртанне міру ў Еўропу. Новыя кааліцыі за мір”. Яе выступленне транслявалася на ютуб-канале форуму.

Паводле слоў палітыка, дэмакратычныя краіны маюць магчымасці “пакараць дыктатараў” эканамічным ціскам, дыпламатычнымі метадамі, а таксама падтрымліваць усіх, хто змагаецца з дыктатарскімі рэжымамі.

“Проста размаўляць з дыктатарамі — часам не найлепшы спосаб вырашэння крызісаў”, — падкрэсліла Ціханоўская.

Яна нагадала, што праз дзеянні рэжыму Аляксандра Лукашэнкі Беларусь стала суагрэсарам у вайне Расіі супраць Украіны, беларуская тэрыторыя і інфраструктура, паводле яе слоў, прадастаўляюцца расіянам для працягу агрэсіі і правакацый на еўрапейскіх межах.

“Таму, калі мы гаворым пра мір у нашым рэгіёне, не трэба выключаць Беларусь з гэтай архітэктуры бяспекі, таму што без свабоднай і дэмакратычнай Беларусі будуць існаваць пастаянныя пагрозы нашым еўрапейскім суседзям”, — адзначыла палітык.

Ціханоўская заявіла, што для дасягнення міру неабходна ў першую чаргу “прыцягнуць вінаватых да адказнасці, таму што цяпер дыктатары адчуваюць сябе беспакаранымі”. “Любое ваганне Еўропы яны ўспрымаюць перш за ўсё як слабасць. І яны ўвесь час падрываюць вашу бяспеку. Яны правяраюць межы дазволенага, наколькі далёка яны могуць зайсці без якой-небудзь рэакцыі”, — сказала дэмлідар.

Палітык падкрэсліла, што цяпер даводзіцца жыць “у зусім новым свеце, дзе такія краіны, як Расія, падрываюць архітэктуру бяспекі Еўропы, і стала відавочна, што <…> трэба рыхтавацца да магчымай эскалацыі”.

“Я шчыра вітаю намаганні па нарошчванні ваеннай моцы Еўрапейскага саюза, таму што дыктатары непрадказальныя. Мы не ведаем, што ў іх на розуме. Расія не ведае, дзе канчаюцца яе межы. Яны лічаць, што Украіна, Беларусь, Малдова і іншыя постсавецкія краіны ўсё яшчэ з’яўляюцца часткай СССР, і ставяцца да нас як да непаслухмяных дзяцей, якія вырашылі самі выбіраць сваю будучыню”, — падкрэсліла Ціханоўская.

Іншыя падрабязнасці даступныя падпісчыкам “Позірк+” (калі спасылка не працуе, карыстайцеся, калі ласка, гэтай)