Жыхар Горацкага раёна выратаваў на пажары двух малалетніх дзяцей

21 лістапада, Позірк. Жыхар Горацкага раёна (Магілёўская вобласць) выратаваў двух малалетніх дзяцей на пажары ў аграгарадку Аўсянка, паведамляе Міністэрства па надзвычайных сітуацыях.

У відэа МНС мужчына прадстаўлены як Сяргей Шындзікаў. Адзначаецца, што да прыбыцця падраздзяленняў ведамства ён стаў сведкам пажару ў суседнім доме, адкуль вынес двухгадовую дзяўчынку і трохгадовага хлопчыка.

Пасля агляду медыкамі дзеці былі шпіталізаваныя.

Паведамляецца, што работнікі МНС аператыўна ліквідавалі пажар. На месцы здарэння працавалі чатыры адзінкі тэхнікі міністэрства.

За мінулыя суткі (з 6:00 20 лістапада да 6:00 21 лістапада) на пажарах у Беларусі загінула 7 чалавек, яшчэ адзін траўмаваны, вынікае з аператыўнай зводкі Міністэрства па надзвычайных сітуацыях.

Паводле даных ведамства, у краіне за гэты час адбылося 19 надзвычайных сітуацый тэхнагеннага характару.

Ад пачатку 2025 года ад агню ў Беларусі загінула 457 чалавек, у тым ліку чацвёра дзяцей (за аналагічны перыяд 2024-га — 449 і 11 адпаведна). Усяго ў гэтым годзе адбылося 5.696 пажараў (5.449).