25 лістапада, Позірк. Злучаныя Штаты Амерыкі пільна сочаць за тым, як Беларусь “заахвочвае і арганізуе мігрантаў у кірунку межаў Еўрасаюза”, называючы гэтую тактыку “выкарыстаннем міграцыі ў якасці зброі”, заявіў на брыфінгу 24 лістапада ў Вашынгтоне высокапастаўлены прадстаўнік Дзярждэпартамента, чыё імя не называецца.
“Што тычыцца Беларусі… міграцыя як зброя, безумоўна, выклікае сур’ёзную заклапочанасць у ЗША, і я ўпэўнены, што гэта сур’ёзна турбуе краіны, якія мяжуюць з Беларуссю і знаходзяцца ў непасрэднай блізкасці ад гэтага канфлікту. Так што мы безумоўна сочым за гэтай сітуацыяй”, — цытуе чыноўніка ўкраінскае англамоўнае выданне Kyiv Post, журналіст якога і задаў адпаведнае пытанне.
Прадстаўнік Дзярждэпа дадаў, што амбасада ЗША ў Беларусі ўдзельнічае ў напісанні праекта даклада па правах чалавека, які будзе прадстаўлены на пачатку наступнага года.
Згодна з праведзеным “Позіркам“ аналізам штодзённых звестак, якія публікуюць памежныя службы Польшчы, Літвы і Латвіі, ад пачатку 2025 года гэтыя краіны прадухілілі больш як 42 тыс. спробаў мігрантаў незаконна перасекчы мяжу з боку Беларусі.
Міграцыйны крызіс на мяжы Беларусі і краін ЕС цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія накіроўваюцца ў Еўрасаюз праз Беларусь, бо іх туды нібыта “паклікалі”.
Апошняе выказванне прагучала 28 кастрычніка на ІІІ Мінскай міжнароднай канферэнцыі па еўразійскай бяспецы. Палітык заявіў, што Беларусь не мае прычын, каб “абараняць Еўрапейскі саюз, Еўропу ад мігрантаў”.
