Затрыманаму на вайсковай базе ў Польшчы беларусу выстаўлена абвінавачванне

24 снежня, Позірк. Затрыманаму на вайсковай базе ў Гдыні (балтыйскае ўзбярэжжа Польшчы) грамадзяніну Беларусі і двум грамадзянам Украіны выстаўлена абвінавачванне ў незаконным пранікненні на ахоўную тэрыторыю, паведамляе RMF FM.

Прэс-сакратар акруговай пракуратуры Гданьска Марыюш Душынскі паведаміў, што расследаванне па факце пранікнення замежнікаў на ваенную базу ў Гдыні было пачата 24 лістапада, пазней яго перадалі ваеннай паліцыі.

Усім затрыманым ад 19 да 21 года, яны маюць сталы від на жыхарства ў Польшчы.

Паводле слоў Душынскага, падазраваныя прызналіся ў здзяйсненні меркаваных злачынстваў. Прэвентыўныя меры да іх не ўжываліся. Цяпер вывучаецца змест іх тэлефонаў.

Пра затрыманне беларуса ўвечары 23 лістапада на тэрыторыі 33-й зенітна-ракетнай эскадрыллі ў Гдыні паведаміў польскі тэлеканал Republika.

Паводле яго інфармацыі, на ваенную базу ў той вечар пранікла трое старонніх. На месца здарэння быў накіраваны патруль, ён затрымаў мужчыну, грамадзяніна Беларусі, які знаходзіўся ў стане алкагольнага ап’янення і заявіў, што заблукаў і не ведаў, што знаходзіцца на вайсковай тэрыторыі. Двое іншых уцяклі і аператыўна не былі затрыманыя.

Удакладнялася, што “падчас расследавання на тэлефоне затрыманага былі выяўленыя фатаграфіі порта і сляды актыўнасці, якія паказваюць на пошукі неўстаноўленага грузу”: “Аднак <…> незразумела, як асобы праніклі на тэрыторыю аб’екта, паколькі не было выяўлена ніякіх слядоў, якія паказваюць на магчымы маршрут. Улады былі апавешчаныя пра інцыдэнт”.