Лукашэнка падпісаў указ, які спрашчае шэраг адміністрацыйных працэдур

9 студзеня, Позірк. Указ “па пытаннях ажыццяўлення адміністрацыйных працэдур” падпісаў 9 студзеня Аляксандр Лукашэнка, паведамляе яго прэс-служба.

Дакумент прадугледжвае скарачэнне колькасці запытаных дакументаў па больш чым 100 адміністрацыйных працэдурах.

У прыватнасці, пры прадастаўленні дакументаў, якія пацвярджаюць аплату за шэраг працэдур, будзе больш выкарыстоўвацца сістэма АРІП. Значная частка звестак будзе запытвацца дзяржаўнымі органамі самастойна.

Выключаюцца працэдуры, якія страцілі актуальнасць, у тым ліку з прычыны аўтаматызацыі ўзаемадзеяння паміж дзяржаўнымі органамі. Так, выключаецца неабходнасць атрымання бацькамі даведак, звязаных з забяспечанасцю дзяцей пуцёўкамі за кошт бюджэтных сродкаў. Адпаведныя звесткі будуць аўтаматычна запытвацца з адзінай сістэмы ўліку такіх дзяцей Рэспубліканскага цэнтра па аздараўленні і санаторна-курортным лячэнні.

Акрамя таго, памяншаюцца тэрміны ажыццяўлення шэрагу адміністрацыйных працэдур. У прыватнасці, скарачаецца з 1 месяца да 20 каляндарных дзён тэрмін выдачы падпісанага акта праверкі ажыццяўлення кансервацыі незавершанага будаўніцтва.

У той жа час замацоўваюцца новыя адміністрацыйныя працэдуры. Напрыклад, гаворка ідзе аб атрыманні згоды органа апекі на адчужэнне жылога памяшкання ў інтарэсах непаўналетняга, які знаходзіцца на дзяржаўным забеспячэнні.

У мэтах “узмацнення прававой абароненасці грамадзян” для ажыццяўлення асобных працэдур ўводзяцца дадатковыя дакументы. Сярод іншага гэта закране здзелкі з дзяржаўнай рэгістрацыяй нерухомасці, якія цягнуць ўзнікненне права агульнай сумеснай уласнасці мужа і жонкі.