У Шчучынскім раёне выяўлены падзёж 728 галоў буйной рагатай жывёлы, узбуджана крымінальная справа

23 студзеня, Позірк. Аб выяўленні супрацоўнікамі ўпраўлення па барацьбе з эканамічнымі злачынствамі УУС Гродзенскага аблвыканкама падзяжу буйной рагатай жывёлы (БРЖ) у адной з гаспадарак Шчучынскага раёна паведаміла 23 студзеня прэс-служба МУС.

Паводле звестак ведамства, 38-гадовы дырэктар арганізацыі “ігнараваў шматлікія прадпісанні кантралюючых службаў аб ліквідацыі недахопаў“. Падчас паўторных праверак аператыўнікі “фіксавалі аналагічныя парушэнні”. “У выніку службовай халатнасці кіраўніка падзёж БРЖ склаў 728 галоў, з якіх 421 — маладняк“, — адзначаецца ў рэлізе.

Шкода ацэньваецца прыкладна ў 1 млн рублёў. У дачыненні да службовай асобы пракуратура ўзбудзіла крымінальную справу.

15 студзеня Аляксандр Лукашэнка, прызначаючы старшынёй Віцебскага аблвыканкама Аляксандра Рагожніка, які да гэтага паўтара года працаваў амбасадарам Беларусі ў Расіі, у чарговы раз завастрыў увагу на праблеме падзяжу жывёлы. “Вам трэба прыстойна гэтым займацца. І хачу вас папярэдзіць, барані божа, там у вас будзе назірацца мор маладняку“, — сказаў ён новаму кіраўніку вобласці.

24 кастрычніка 2025 года на нарадзе аб мерах па забеспячэнні ўстойлівага развіцця Віцебскай вобласці і сітуацыі з морам у краіне буйной рагатай жывёлы Лукашэнка заявіў, што “самае галоўнае — нельга працу ў жывёлагадоўлі ператвараць у крымінальную дзейнасць“. Паводле яго слоў, негатыўныя тэндэнцыі зафіксаваныя ў 51 раёне краіны (у 13 з іх падзёж павялічыўся ў 1,5 раза і больш).

Летась 29 траўня на першым пасяджэнні ўрада новага складу Лукашэнка паскардзіўся, што падзеж жывёлы “дасягнуў гістарычнага максімуму“.

Пагалоўе буйной рагатай жывёлы (каровы, быкі і інш.) на канец кастрычніка 2025 года склала 3.915.838 — на 2,6% менш, чым было годам раней (4.018.755), вынікае з праведзенага “Позіркам“ аналізу звестак Нацыянальнага статыстычнага камітэта.

Адмоўная дынаміка зафіксаваная ва ўсіх абласцях: у Віцебскай пагалоўе скарацілася на 7,2% (з 488.795 да 453.506), Магілёўскай — на 6,1% (з 492.503 да 462.482), Гомельскай — на 3,9% (з 593.476 да 570.492), Мінскай — на 0,9% (з 909.052 да 900.634), Брэсцкай — на 0,5% (з 853.449 да 848.961), Гродзенскай — на 0,3% (з 681.480 да 679.763).

Агулам па краіне колькасць кароў скарацілася на 1,3% да 1.364.211 (было 1.382.444).