З Беларусі могуць выслаць яшчэ 11 польскіх святароў

16 жніўня, Позірк. Яшчэ 11 польскіх каталіцкіх святароў Мінска-Магілёўскай архідыяцэзіі могуць пакінуць Беларусь, бо яны не атрымалі дазвол ад упаўнаважанага па справах рэлігій і нацыянальнасцяў на працяг рэлігійнай дзейнасці, а “некаторыя атрымалі такі дазвол на мінімальны тэрмін”, паведамляе ініцыятыва “Хрысціянская візія”.

Адзначаецца, што ў сувязі з гэтым старшыня Канферэнцыі каталіцкіх біскупаў Беларусі, мітрапаліт Мінска-Магілёўскі Іосіф Станеўскі накіраваў просьбу да Аляксандра Лукашэнкі аб “падаўжэнні дазволу на служэнне гэтых святароў у Беларусі”.

Называецца прозвішча аднаго святара з 11 — Раман Шульц, які служыў у Беларусі з 2007 года. Паведамляецца, што з ім ужо “развіталіся” 15 жніўня падчас імшы з нагоды свята Унебаўзяцця Найсвяцейшай Панны Марыі ў кафедральным касцёле ў Магілёве.

“Гэты манах з ордэна дамініканцаў таксама не атрымаў дазволу на далейшую рэлігійную дзейнасць у Беларусі і павінен пакінуць краіну ў бліжэйшыя дні, — гаворыцца ў публікацыі. — Амаль 15 гадоў ён быў адміністратарам парафіі святога Казіміра і святой Ядвігі ў Магілёве, праводзіў штогадовы Ружанцовы кангрэс, быў ініцыятарам іншых мерапрыемстваў, аўтарам публіцыстычных матэрыялаў у каталіцкай прэсе Беларусі”.

Падкрэсліваецца, што згаданая імша ў магілёўскім храме прайшла з удзелам апостальскага нунцыя ў Беларусі арцыбіскупа Ігнацыа Чэфалія, Станеўскага і генеральнага вікарыя Мінска-Магілёўскай архідыяцэзіі біскупа Аляксандра Яшэўскага.

28 траўня ў інтэрв’ю Vatican News Станеўскі заявіў пра недахоп каталіцкіх святароў у краіне. Паводле яго слоў, кадравае пытанне для касцёла “застаецца вострым: колькасць духавенства ў самой Беларусі паступова скарачаецца, асабліва ва ўсходніх рэгіёнах”.

У Магілёўскай вобласці адзін святар вымушаны абслугоўваць тры парафіі, “пераадольваючы сотні кіламетраў”, дадаў іерарх.

Сітуацыя ўскладняецца і тым, што святары з Польшчы, якія служылі дзесяцігоддзямі, усё часцей не атрымліваюць дазволу на далейшую працу, адзначыў ён.

20 траўня ”Хрысціянская візія“ паведаміла пра адмову беларускіх уладаў падоўжыць дазвол на далейшае служэнне ў Беларусі пяці каталіцкім святарам і аднаму манаху Мінска-Магілёўскай архідыяцэзіі, якія маюць польскае грамадзянства.

Раней стала вядома пра адмову дазволіць далейшае служэнне тром каталіцкім польскім святарам у Віцебскай дыяцэзіі, да гэтага — двум святарам у Пінскай дыяцэзіі.

Многія вернікі і рэлігійныя дзеячы адкрыта выказваліся аб грамадска-палітычным крызісе, які ўзнік на фоне сфальсіфікаваных прэзідэнцкіх выбараў 2020 года і жорсткасці сілавікоў у дачыненні да ўдзельнікаў пратэстных акцый, з прычыны чаго рэжым Лукашэнкі ўзмацніў кантроль рэлігійнай сферы.

У 2023 годзе на заканадаўчым узроўні рэлігійным арганізацыям фактычна было забаронена праяўляць палітычную актыўнасць не ў фарватары ўладаў, была абвешчаная перарэгістрацыя.

З пачатку восені 2020 года па канец красавіка 2026-га, паводле звестак “Хрысціянскай візіі“, з рэпрэсіямі ў Беларусі ў той ці іншай форме сутыкнулася не менш за 93 хрысціянскіх служыцелі, сярод іх 36 каталіцкіх.