Палітвязнямі прызнана яшчэ восем чалавек

28 студзеня, Позірк. Праваабарончая супольнасць 28 студзеня прызнала палітычнымі вязнямі яшчэ восем чалавек, паведамляе цэнтр “Вясна“.

Статус атрымалі асуджаныя да пазбаўлення волі Максім Дудорга (чатыры гады, арт. 361⁴), Сяргей Васюкевіч (тэрмін невядомы, 361⁴), Аляксей Шыловіч (тэрмін невядомы, 368), Аляксандр Нядзведскі (тэрмін невядомы, 361⁴), Уладзімір Джараеў (тэрмін невядомы, 361¹, 368, 369), Сяргей Літвінка (тэрмін невядомы, 367), а таксама асуджаны да абмежавання волі з накіраваннем у папраўчую ўстанову адкрытага тыпу Аляксей Ісаеў (пяць гадоў, 361⁴) і затрыманы Віталь Выпражкін, абвінавачаны па справе “Беларускага Гаюна“ па арт. 361⁴.

Заяву акрамя “Вясны“ падпісалі Беларускі ПЭН, Беларускі дом правоў чалавека імя Звозскага, Lawtrend, Беларуская асацыяцыя журналістаў, Беларускі Хельсінкскі камітэт, Human Constanta, Офіс па правах людзей з інваліднасцю, “Прававая ініцыятыва”.

Агульная колькасць палітвязняў узрасла да 1.158. Праваабаронцы працягваюць беспаспяхова патрабаваць неадкладна вызваліць усіх палітвязняў і спыніць рэпрэсіі.

Даведка “Позірку“:

арт. 361¹ Крымінальнага кодэкса — стварэнне экстрэмісцкага фарміравання або ўдзел у ім;

арт. 361⁴ — садзейнічанне экстрэмісцкай дзейнасці;

арт. 367 — паклёп у дачыненні да прэзідэнта;

арт. 368 — абраза прэзідэнта;

369 — абраза прадстаўніка ўлады.