Ціханоўская — спецпрадстаўніку ЕС: Беларускі рэжым ведае ўмовы зняцця санкцый
13 лютага, Позірк. Беларускі рэжым ведае, што павінен зрабіць для зняцця еўрапейскіх санкцый. Пра гэта заявіла Святлана Ціханоўская на сустрэчы са спецыяльным прадстаўніком Еўрасаюза па правах чалавека Кайсай Олангрэн (Нідэрланды), паведаміў “Позірку“ галоўны дарадца дэмлідара Франак Вячорка.
Перамовы прайшлі на палях Мюнхенскай канферэнцыі па бяспецы з удзелам былога палітвязня, мужа Ціханоўскай Сяргея Ціханоўскага.
Паводле слоў Вячоркі, Святлана і Сяргей Ціханоўскія праінфармавалі пра працэс вызвалення беларускіх палітвязняў, адзначыўшы значную ролю ЗША ў гэтым пытанні, і падкрэслілі неабходнасць падтрымкі гуманітарнага трэка.
Яны абмеркавалі формулу, у адпаведнасці з якой санкцыі ЗША могуць змякчацца пры ўмове вызвалення людзей і спынення рэпрэсій, але ў цяперашні час не можа быць гаворкі пра змякчэнне санкцый ЕС, уведзеных, у прыватнасці, за садзейнічанне расійскай агрэсіі ва Украіне і гібрыдныя атакі супраць краін — суседзяў Беларусі.
Дэмлідар адзначыла, што, на жаль, месца вызваленых палітвязняў займаюць новыя. Пры гэтым рэпрэсіі — гэта “не толькі пра людзей у турмах, але і пра забарону нелаяльных рэжыму СМІ і партый, пераслед прафсаюзаў, немагчымасць вяртання людзей у Беларусь, абмежаванне іх мабільнасці“.
Паводле слоў Вячоркі, Ціханоўскія і Олангрэн абмеркавалі таксама супрацоўніцтва з вярхоўным камісарам ААН па правах чалавека.
