Рыжанкоў выказаў “нязменную падтрымку брацкаму кубінскаму народу”

16 лютага, Позірк. “Нязменную падтрымку брацкаму кубінскаму народу” выказаў міністр замежных спраў Максім Рыжанкоў 16 лютага на сустрэчы з амбасадарам Кубы Сант’яга Перэсам Бенітасам.

Паводле інфармацыі беларускага знешнепалітычнага ведамства, чыноўнік пацвердзіў “пазіцыю Мінска пра непрымальнасць прымянення аднабаковых прымусовых захадаў”.

Рыжанкоў, як адзначаецца, “падкрэсліў неабходнасць вырашэння ўсіх рознагалоссяў шляхам мірнага дыялогу і ў рамках міжнароднага права”.

Бакі, як сцвярджае МЗС, выказалі “агульную нацэленасць на працяг сумеснай працы па падтрыманні пазітыўнай дынамікі беларуска-кубінскіх кантактаў”, адзначыўшы “зладжаныя намаганні Мінска і Гаваны па рэалізацыі дамоўленасцей, дасягнутых у ходзе ўзаемных візітаў на вышэйшым і высокім узроўнях у 2025 годзе”.

12 лютага беларуская амбасада на Кубе паведаміла пра прыпыненне на нявызначаны тэрмін вылетаў у гэту краіну, адзначыўшы, што беларускія грамадзяне, якія там знаходзяцца, “могуць спланаваць сваё вяртанне ў адпаведнасці з графікам, апублікаваным авіякампаніямі”.

5 лютага МЗС Беларусі распаўсюдзіла заяву, у якой адзначыла, што “з занепакоенасцю сочыць за сітуацыяй вакол Кубы і паставак энергарэсурсаў у гэту краіну”.

“Асаблівыя асцярогі” ў беларускіх дыпламатаў выклікае “пагроза перарастання цяперашняй эскалацыі ў Карыбскім басейне ў сур’ёзны гуманітарны крызіс з непрагназавальнымі наступствамі”.

Паведамлялася, што Мінск “нязменна настойвае на непрымальнасці прымянення аднабаковых прымусовых захадаў, якія ствараюць перашкоды для гандлёвых стасункаў паміж дзяржавамі, стрымліваюць працэс усебаковага сацыяльна-эканамічнага развіцця і абцяжарваюць забеспячэнне дабрабыту насельніцтва”.

“Цвёрда перакананыя ў тым, што ўсе рознагалоссі маюць вырашацца шляхам мірнага дыялогу і ў рамках міжнароднага права”, — гаварылася ў заяве.

29 студзеня прэзідэнт ЗША Дональд Трамп падпісаў указ, які абвяшчае надзвычайнае становішча ў краіне і ўсталёўвае парадак увядзення пошлін на тавары з краін, якія прадаюць ці іншым чынам пастаўляюць нафту на Кубу, “з мэтай абароны нацыянальнай бяспекі і знешняй палітыкі ЗША ад зламысных дзеянняў і палітыкі кубінскага рэжыму”.

Указ уводзіць новую тарыфную сістэму, якая дазваляе Злучаным Штатам уводзіць дадатковыя тарыфы на імпарт з любой краіны, якая наўпрост ці ўскосна пастаўляе нафту на Кубу.

У каментарыі Белага дома адзначалася, што “кубінскі рэжым супрацоўнічае са шматлікімі варожымі краінамі і зламыснымі суб’ектамі, днааючы ім свае вайсковыя і выведвальныя магчымасці. Напрыклад, на Кубе знаходзіцца найбуйнейшы замежны аб’ект Расіі па зборы радыёвыведніцкай інфармацыі, прызначаны для крадзяжу канфідэнцыйнай інфармацыі, якая тычыцца нацыянальнай бяспекі”.

Падкрэслівалася, што кубінскі рэжым “пераследуе і ўжывае катаванні да палітычных апанентаў, забараняе свабоду слова і прэсы, карумпавана нажываецца на бедствах кубінскага народа і распальвае хаос, распаўсюджваючы камуністычную ідэалогію па ўсім рэгіёне”.

Гэтыя дзеянні, лічаць у Вашынгтоне, “прадстаўляюць сабой незвычайную і надзвычайную пагрозу нацыянальнай бяспецы і знешняй палітыцы ЗША, якая патрабуе неадкладнага рэагавання для абароны амерыканскіх грамадзян і інтарэсаў”.

Раней ЗША зрабілі захады па блакаванні паставак нафты на Кубу, у тым ліку з Венесуэлы, што прывяло да росту цэн на прадукты харчавання і транспарт, а таксама выклікала сур’ёзны дэфіцыт паліва.

30 студзеня Куба абвясціла “міжнароднае надзвычайнае становішча”.

Беларусь і Куба аднагалосна і паслядоўна выступаюць “супраць аднабаковых абмежавальных захадаў у міжнароднай палітыцы і гандлі”, заявіў Аляксандр Лукашэнка летась 25 чэрвеня на сустрэчы з першым сакратаром Цэнтральнага камітэта Камуністычнай партыі Кубы, прэзідэнтам краіны Мігелем Дыяс-Канель Бярмудэсам, які наведваў Мінск для ўдзелу ў пасяджэнні Вышэйшага Еўразійскага эканамічнага савета (Куба — назіральнік у ЕАЭС).

Куба — адна з бедных краін Лацінскай Амерыкі і Карыбскага басейна. Пазіцыянуе сябе як сацыялістычная рэспубліка, адзіная партыя ў краіне — камуністычная, апазіцыя пераследуецца.

У траўні 2025 года ў Гаване прайшло чарговае пасяджэнне кубінска-беларускай камісіі па гандлёва-эканамічнай супрацы.

У сярэдзіне лютага таго ж года на Нацыянальным прававым інтэрнэт-партале быў апублікаваны пратакол да міжурадавага пагаднення ад 24 чэрвеня 2014 года з пералікам тавараў, якія Беларусь і Куба хацелі б пастаўляць адзін аднаму ў рамках “сустрэчнага гандлю”. Згодна з дакументам, для кожнага боку “пры ўзаемных пастаўках тавараў і паслуг вызначаецца ліміт у 15 млн долараў ЗША на пяцігадовы перыяд”.

17 ліпеня 2024 года прэзідэнт Кубы на сустрэчы з Раманам Галоўчанкам, які тады ўзначальваў беларускі ўрад, асудзіў санкцыі ЗША супраць Беларусі і ўмяшанне ў яе справы.

11 лютага стала вядома, што Рыжанкову даручана прадстаўляць Беларусь 19 лютага на планаваным да правядзення ў ЗША першым пасяджэнні лідараў “Савета міру”, які ствараецца з ініцыятывы Дональда Трампа.