Другі з пачатку 2026 года выпадак загарання аўтобуса МАЗ зафіксаваны ў Чабаксарах

19 лютага, Позірк. Аб чарговым узгаранні пасажырскага аўтобуса Мінскага аўтамабільнага завода ў Расіі паведаміў тэлеграм-канал Mash Iptash. Гэта здарылася ў Чабаксарах (сталіца Чувашыі).

На апублікаваным відэазапісе бачна, як людзі снегам гасяць полымя.

Раней рэгіянальнае ўпраўленне МНС РФ паведаміла, што 22 студзеня ў сталіцы рэспублікі загарэўся маршрутны аўтобус МАЗ.

У 2025 годзе беларускія аўтобусы рэгулярна загараліся падчас руху ў Расіі і Беларусі, прычынай называліся санкцыі, уведзеныя супраць МАЗа дэмакратычнымі краінамі. Яны пазбавілі прадпрыемства часткі якасных камплектуючых.

Апошні падобны выпадак, пра які пісалі СМІ, быў зафіксаваны ў Самары 9 кастрычніка 2025 года. Да гэтага аўтобусы гарэлі: 5 ліпеня — у Іркуцку, 14 траўня — у Варонежскай вобласці, 5 красавіка — у Санкт-Пецярбургу, 23 сакавіка — у Кіраве, 13 студзеня — у Ліпецку.

24 лістапада 2025 года на сустрэчы з губернатарам Яраслаўскай вобласці Расіі Міхаілам Еўраевым Аляксандр Лукашэнка падняў гэтую тэму: “Я спрабаваў разабрацца, што ж там гарыць, з Піцера пачынаючы. Там жа ў нас абсалютна ліберальныя сродкі масавай інфармацыі — што хочуць, тое і робяць. Аказваецца, не ўсё тое гарыць, што гарыць у сродках масавай інфармацыі. Але над якасцю вельмі сур’ёзна працуем”.

За 2025 год на рынку РФ рэалізавана 499 аўтобусаў МАЗ (у 2024-м — 504; -1%).