У 2025 годзе Беларусь накіравала 289 запытаў на выдачу суайчыннікаў для прыцягнення да крымінальнай адказнасці
19 лютага, Позірк. У 2025 годзе Беларусь накіравала ў іншыя краіны 289 запытаў на выдачу суайчыннікаў для прыцягнення іх да крымінальнай адказнасці, паведаміў намеснік генеральнага пракурора Аляксей Стук на прэс-канферэнцыі 19 лютага.
Паводле яго слоў, атрыманы 41 запыт аб выдачы злачынцаў, якія хаваюцца ў Беларусі.
У іншыя дзяржавы перададзена 45 крымінальных спраў для пераследу фігурантаў, у Беларусь паступіла 12 спраў.
Мінск працягвае спробы экстрадыцыі з-за мяжы людзей, якія пераследуюцца на радзіме з палітычных матываў, па лініі Міжнароднай арганізацыі крымінальнай паліцыі, выкарыстоўваючы, у прыватнасці, абвінавачанні ў эканамічных злачынствах.
Гучны рэзананс атрымаў арышт у Сербіі ў 2024 годзе рэжысёра Андрэя Гнёта, якога беларускія сілавікі абвінавачвалі ў нявыплаце падаткаў. Пасля года ўтрымання ў турме і пад хатнім арыштам ён змог пакінуць краіну дзякуючы прэзідэнту краіны Аляксандру Вучычу.
Вядома пра некалькі выпадкаў, калі ўлады Арменіі на запыт беларускіх уладаў затрымлівалі актывістаў, але затым адпускалі і давалі прытулак.
Раней беларускія ўлады спрабавалі выкарыстоўваць міжнародную паліцыю для затрымання Святланы Ціханоўскай, аднак у Інтэрпале палічылі немагчымым выкарыстоўваць свае каналы для міжнароднага вышуку кандыдата на пасаду прэзідэнта на выбарах-2020.
У траўні 2024 года начальнік Нацыянальнага цэнтральнага бюро Інтэрпала ў Беларусі (з’яўляецца структурным падраздзяленнем МУС) Дзмітрый Мядзведзеў наракаў у эфіры тэлеканала “Беларусь 1“, што Літва і Латвія ніяк не рэагуюць на запыты беларускага боку.
Іншыя падрабязнасці даступныя падпісчыкам “Позірк+” (калі спасылка не працуе, карыстайцеся, калі ласка, гэтай)
