Сейм Літвы прыняў да разгляду законапраект аб падаўжэнні санкцый супраць грамадзян Беларусі і РФ да канца 2027 года

12 сакавіка, Позірк. Законапраект аб падаўжэнні да канца 2027 года санкцый у дачыненні да грамадзян Беларусі і Расіі прайшоў стадыю прадстаўлення ў Сейме Літвы — 12 сакавіка большасць дэпутатаў прагаласавала за тое, каб прыняць яго да разгляду, паведамляе прэс-служба літоўскага парламента.

Тэрмін дзеяння цяперашніх нацыянальных санкцый заканчваецца 2 траўня 2026 года. Калі ў працэсе абмеркавання законапраект не зменіцца ў плане перыяду дзеяння, то ўпершыню абмежавальныя меры будуць прынятыя не на год, як раней, а на больш за працяглы тэрмін.

12 сакавіка праект закона прадставіла парламенту Міністэрства замежных спраў Літвы. У тлумачальнай нататцы знешнепалітычнага ведамства канстатавана, што “прычыны прыняцця закона не зніклі, бо Расія і яе саюзніца Беларусь працягваюць беспрэцэдэнтную ваенную агрэсію супраць Украіны”.

Адзначаецца таксама, што “на ўказанне ці з ведама расійскіх і беларускіх уладаў ствараюцца спрыяльныя ўмовы для гібрыдных нападаў і розных правакацый супраць” Літвы. Падкрэсліваецца, што вайна РФ супраць Украіны “працягвае чыніць істотны негатыўны ўплыў на бяспеку не толькі дзяржаў ЕС і краін НАТО, але і ўсёй Еўропы”.

У законе прапануецца прапісаць забарону на ўвоз паліва з Беларусі і РФ у стандартных паліўных баках транспартных сродкаў, калі колькасць паліва перавышае 200 літраў. Аўтары паправак лічаць, што такія абмежаванні “маюць прадухіліць магчымыя парушэнні санкцый ЕС і ўскосную падтрымку рэжымаў” у Маскве і Мінску, “калі паліва са стандартных бакаў грузавых аўтамабіляў, што зарэгістраваныя у трэціх краінах і прыбываюць з Расіі і Беларусі, зліваецца і прадаецца на тэрыторыі Літвы”.

Пасля ўвядзення гэтай забароны, на думку распрацоўшчыкаў паправак, “у выпадку выяўлення перавышэння аб’ёму паліва ў баку транспартнага сродку можна будзе прымяняць адказнасць, прадугледжаную Крымінальным кодэксам, Кодэксам аб адміністрацыйных правапарушэннях або Законам аб міжнародных санкцыях”.

Прэс-служба Сейма нагадала, што дзейным законам аб абмежавальных мерах прыпынены прыём заяў ад грамадзян РФ і Беларусі на атрыманне шэнгенскай візы — за выключэннем выпадкаў, калі хадайніцтва пра візу падаецца пры пасярэдніцтве МЗС Літвы. Акрамя таго, прыпынены прыём заяў грамадзян РФ на атрыманне дазволу на часовае пражыванне ў Літве (выключэнне — тыя, хто мае дзейную шэнгенскую або нацыянальная віза альбо дазвол на жыхарства ў Літве ці ў іншай краіне ЕС).

Для расіян, якія ўязджаюць на літоўскую тэрыторыю праз знешнюю мяжу ЕС, прымяняецца “індывідуальная дадатковая паглыбленая праверка, якая ацэньвае пагрозу для нацыянальнай бяспекі Літвы, грамадскага парадку, унутранай бяспекі, грамадскага здароўя або міжнародных стасункаў”. Грамадзянам РФ, якія не маюць дазволу на пражыванне ў Літве, забаронена набываць нерухомасць у краіне.

У выпадках, калі грамадзяне Беларусі ўязджаюць у Літву праз знешнюю мяжу ЕС, “дадаткова ацэньваецца рызыка пагрозы грамадскаму парадку, унутранай бяспецы, грамадскаму здароўю або міжнародным ствасункам любой з краін Шэнгенскай зоны”. Пры неабходнасці праводзіцца другасная праверка, прадугледжаная Шэнгенскім кодэксам аб межах.

Нагадваецца таксама, што раней Сейм забараніў імпарт сельскагаспадарчай прадукцыі і кармоў, вырабленых у Беларусі і РФ.

Пасля працэдуры прадстаўлення законапраект накіраваны на асноўнае абмеркаванне ў парламенцкі Камітэт па замежных справах, на дадатковае — у Камітэт па бюджэце і фінансах. Чакаецца, што Сейм вернецца да разгляду праекту закона аб санкцыях 7 красавіка.

Адметна, што 11 сакавіка літоўскія СМІ паведамілі пра перанос разгляду пытання адносна гэтага законапраекту на наступны тыдзень. Як адзначалася, гэта адбылося пасля таго, як дэпутат ад апазіцыйнага “Руху лібералаў” Сімонас Гентвілас заявіў, што намеснік міністра замежных спраў Відмантас Вербіцкас не ўпаўнаважаны ўрадам прадстаўляць гэты законапраект.

12 сакавіка праект дакумента прадставіў іншы намеснік кіраўніка МЗС — Сігітас Міткус.