Рада БНР узнагародзіла медалямі больш за 20 асобаў, у тым ліку беларускіх добраахвотнікаў ва УСУ

26 сакавіка, Позірк. Старшыня Рады Беларускай Народнай Рэспублікі Івонка Сурвіла ў Дзень Волі 25 сакавіка падпісала дэкрэты аб ўзнагароджанні медалямі.

Медалямі Ордэна Пагоні уганараваныя галоўны рэдактар еўрапейскага беларускага выдавецтва Gutenberg Publisher Валянціна Андрэева і старшыня Беларускага ПЭНа Таццяна Нядбай.

“Ва ўмовах, калі ціск на нацыянальную культуру, на беларускую мову набыў татальны характар, калі дзясяткі людзей слова за кратамі, вольны кнігадрук і адстойванне права на свабоду выказванняў робяцца аднымі з умоваў выжывання беларусаў як этнасу”, — адзначыла Рада БНР.

Медалём Ордэна Пагоні таксама ўганараваны публіцыст Віталь Цыганкоў, які “стаяў ля вытокаў беларускай незалежнай журналістыкі і чые публікацыі былі прыкметнай з’явай яшчэ ў гады змагання за аднаўленне Незалежнасці ў пачатку 90-х гадоў ХХ стагоддзя”.

Асобным дэкрэтам старшыні Рады БНР медалямі “За баявыя заслугі” першай і другой ступені ўзнагароджаныя 19 беларускіх добраахвотнікаў у складзе Узброеных сіл Украіны. Гэтым адзначаны «іх асабісты гераізм у змаганні з расійскім агрэсарам, збройная абарона ад якога Украіны служыць таксама справе беларускіх нацыянальных інтарэсаў і здабыцця незалежнай ды вольнай будучыні для Беларусі”.

24 сакавіка праваабаронцу і нобелеўскаму лаўрэату Алесю Бяляцкаму быў уручаны Ордэн Пагоні — найвышэйшая ўзнагарода Рады БНР. Ён быў узнагароджаны ім у 2024 годзе, калі знаходзіўся за кратамі — “за выбітныя заслугі маральна-грамадскага лідарства нацыянальнага маштабу на абароне грамадзянскіх і нацыянальна-культурных правоў і законнасці Беларусі ў варунках асабістае небяспекі”.