З пачатку сакавіка на беларускіх метэастанцыях зафіксавана больш за 150 тэмпературных рэкордаў

Апублікавана на адкрытай версіі “Позірку” 27 сакавіка 2026 года ў 17:37

27 сакавіка, Позірк. Больш за 150 тэмпературных рэкордаў зафіксавана на беларускіх метэастанцыях з пачатку сакавіка, сведчыць праведзены “Позіркам“ параўнальны аналіз аператыўных і даступных архіўных даных Белгідрамета.

З 20 сакавіка рэкорды цяпла абнаўляюцца штодня. 26 сакавіка перакрыта пяць лакальных гістарычных максімумаў дня: на метэастанцыі “Палеская“ ў Лунінецкім раёне — 16,9 градуса вышэй за нуль (было 16,4 у 2015 годзе), у Лельчыцах — 16,5 (15,5 у 2007-м), Бярэзінскім запаведніку — 15,1 (14,9 у 2007-м), Езярышчы — 14,8 (14,4 у 2007-м) і Оршы — 14 (13,9 у 2015-м).

“Палеская” разам з раёнам метэастанцыі ў Акцябрскім сталі самымі цёплымі месцамі. Абсалютны рэкорд дня трымаецца з 2014 года (+21 у гэтым жа раённым цэнтры Гомельскай вобласці).

З 27 па 29 сакавіка Белгідрамет прагназуе цёплае для гэтага часу надвор’е з дзённымі максімумамі да 18-19 градусаў. Рэкорд для 27 сакавіка — 20,6 у Брэсце ў 1973 годзе.