Трамп чакае сустрэчы з Лукашэнкам на наступным пасяджэнні Савета міру

30 сакавіка, Позірк. Пра чаканне сустрэчы з Аляксандрам Лукашэнкам на наступным пасяджэнні Савета міру заявіў прэзідэнт Злучаных Штатаў Амерыкі Дональд Трамп.

Амерыканскі палітык нагадаў у сваёй сацыяльнай сетцы TruthSocial, што пасля перагавораў яго спецпасланніка па Беларусі Джона Коўла з “глыбокапаважаным прэзідэнтам Аляксандрам Лукашэнкам” атрымалася дамагчыся вызвалення яшчэ 250 палітычных зняволеных.

Гэта давяло агульную колькасць вязняў, “вялікадушна вызваленых прэзідэнтам Лукашэнкам з мінулага траўня, да ўзроўню, які значна перавышае 500 чалавек”. Трамп выказаў за гэта “шчырую падзяку”.

Па выніках сустрэчы з амерыканскай дэлегацыяй 19 сакавіка ў Мінску Лукашэнка памілаваў 250 зняволеных, з якіх 235 было дазволена застацца на радзіме, а 15 вывезена ў Літву (трое пасля накіраваліся ў Польшчу).

У адказ адміністрацыя Трампа паабяцала зняць яшчэ частку санкцый — з “Белінвестбанка”, Банка развіцця, Міністэрства фінансаў, “Беларуськалія” і Беларускай калійнай кампаніі (БКК).

26 сакавіка ЗША афіцыйна знялі абмежаванні з “Беларуськалія” і БКК. Акрамя таго, знятыя санкцыі з украінскага “Аграросквіту” (Кіеў) — даччынага прадпрыемства БКК.

Пасля Коўл заявіў, што на перамовах 19 сакавіка ў Менску сярод іншага абмяркоўвалася магчымая паездка Лукашэнкі ў ЗША.

20 сакавіка, распавядаючы прапагандыстам свайго пула пра перагаворы з амерыканцамі, Лукашэнка казаў пра вялікую здзелку з ЗША: “Мы гатовыя, Дональд прапануе вялікую здзелку і сустрэцца. Аж да таго, што ў яго дома, у Фларыдзе, і дамовіцца”.

15 студзеня Трамп абвясціў пра фармаванне Савета міру, які будзе кіраваць аднаўленнем сектара Газа. Стварэнне гэтай структуры ўваходзіць у мірны план амерыканскага лідара для Газы нараўне з размяшчэннем міжнародных сіл.

Лукашэнка атрымаў запрашэнне ўступіць у Савет міру і падпісаў дакумент пра далучэнне Беларусі да яго 20 студзеня.

Устаноўчае пасяджэнне Савета міру адбылося 22 студзеня 2026 года ў Давосе, інаўгурацыйнае — 19 лютага ў Вашынгтоне. Інфармацыі пра дату наступнай сустрэчы няма.

Лукашэнка на інаўгурацыйнае пасяджэнне арганізацыі не з’явіўся. Яго прэс-сакратар Наталля Эйсмант патлумачыла гэта тым, што беларускі бок нібыта позна атрымаў запрашэнне. На сустрэчу быў дэлегаваны міністр замежных спраў Максім Рыжанкоў (чыноўнік на яе не трапіў — дэлегацыя не змагла атрымаць візы).

16 лютага Лукашэнка выклаў іншую версію. “Я што, мусіў у сувязі з гэтымі санкцыямі праз Паўднёва-Афрыканскую Рэспубліку ляцець у Вашынгтон?” — задаўся ён пытаннем на сустрэчы ў Мінску з дзяржаўным сакратаром Саюзнай дзяржавы (СД) Сяргеем Глазьевым.

“Калі вы хацелі мяне там бачыць, вырашыце пытанне, каб я мог спакойна прыляцець і паляцець адтуль. Яшчэ пытанне паднімаюць бяспекі. Ах, Лукашэнка пабаяўся, там пытанне бяспекі. Слухайце, гэта не да Лукашэнкі пытанне. Я ніколі не баяўся нікога і баяцца не збіраюся. Гэта поўнае глупства. Вось Лукашэнка там нехта схопіць і дадому не выпусціць. Ну тупасць поўная. Я нават не ўяўляю, каб магло такое здарыцца з любым іншым прэзідэнтам ці са мной”, — сказаў ён.