Праваабаронцы прызналі палітвязнямі яшчэ сем чалавек

5 траўня, Позірк. Беларускія праваабарончыя арганізацыі 5 траўня выступілі з сумеснай заявай аб прызнанні палітвязнямі сямі чалавек.

Праваабаронцы прынялі такое рашэнне, атрымаўшы інфармацыю “пра выстаўленне абвінавачанняў, узяццё пад варту і вынясенне прыгавораў” паводле ч. 1 арт. 342 КК у дачыненні да Дзмітрыя Барабана і Алены Лабанавай, а таксама пра накіраванне ў пенітэнцыярныя ўстановы асуджаных паводле гэтага жа артыкула Максіма Жука, Дзмітрыя Шакаліды, Артура Гранічнага, Андрэя Колба і Юрыя Гадуна.

Праваабаронцы патрабуюць ад уладаў Беларусі неадкладна вызваліць пералічаных людзей і спыніць іх крымінальны пераслед; неадкладна вызваліць усіх палітвязняў, а таксама грамадзян, затрыманых у сувязі з рэалізацыяй свабоды мірных сходаў у поствыбарчы перыяд; спыніць палітычныя рэпрэсіі ў дачыненні да грамадзян краіны.

Заяву падпісалі праваабарончы цэнтр “Вясна”, Беларуская асацыяцыя журналістаў, Беларускі Хельсінкскі Камітэт, Офіс па правах людзей з інваліднасцю, “Прававая ініцыятыва”, Lawtrend, Human Constanta.

Цяпер у спісе на сайце “Вясны” ў якасці палітвязняў фігуруюць 842 чалавекі.

Даведка “Позірку”:

• арт. 342 — арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх.