Перамоваў пра транзіт беларускіх угнаенняў не вядзецца — дарадца прэм’ера Літвы

15 траўня, Позірк. Ніякіх перамоваў пра транзіт беларускіх угнаенняў праз Літву не вядзецца, заявіў дарадца прэм’ер-міністра гэтай балтыйскай краіны Ігнас Дабравольскас.

Паводле слоў чыноўніка, як піша партал навін Delfi, заявы міністра замежных спраў Кястуціса Будрыса на гэты конт і іх кантэкст “спачатку павінна пракаментаваць само” знешнепалітычнае ведамства.

“Са свайго боку, я магу паўтарыць пазіцыю, выказаную прэм’ер-міністрам. Мы ўдзячныя ЗША за іх намаганні па аказанні дапамогі ў вырашэнні пытанняў па Беларусі ў такіх галінах як перамяшчэнне фур, інцыдэнты з паветранымі шарамі і вызваленне палітычных вязняў”, — сказаў Дабравольскас.

Пры гэтым ён падкрэсліў, што пазіцыя Літвы застаецца “выразнай і паслядоўнай”: “Мы прытрымліваемся і падтрымліваем санкцыі Еўрапейскага саюза супраць Беларусі”.

“Ва ўмовах дзейных санкцый ЕС пытанне транзіту ўгнаенняў абмяркоўвацца не можа”, — заявіў дарадца прэм’ера.

Што датычыцца сустрэчы прадстаўнікоў Літвы і Беларусі на тэхнічным узроўні, то яна, паводле слоў Дабравольскаса, магчымая толькі пры ўмовах, раней выкладзеных кіраўніцай урада Інгай Ругінене, — пасля спынення інцыдэнтаў з метэазондамі, вяртання ўсіх затрыманых фур без дадатковых грашовых збораў і спынення незаконнай міграцыі праз мяжу.

Напярэдадні паведамлялася, што кіраўнік МЗС Будрыс на закрытай сустрэчы з фракцыяй сацыял-дэмакратаў паведаміў пра ціск ЗША на Літву з мэтай аднаўлення транзіту беларускіх угнаенняў.

Па выніках сустрэчы з амерыканскай дэлегацыяй 19 сакавіка ў Мінску Аляксандр Лукашэнка памілаваў 250 вязняў, з якіх 235 дазволена застацца на радзіме, а 15 было вывезена ў Літву (трое пасля накіраваліся ў Польшчу). У адказ адміністрацыя прэзідэнта ЗША Дональда Трампа паабяцала зняць у Беларусі частку санкцый (з “Белінвестбанка”, Банка развіцця, Міністэрства фінансаў, “Беларуськалія”, Беларускай калійнай кампаніі).

Упраўленне па кантролі за замежнымі актывамі Міністэрства фінансаў ЗША (OFAC) 26 сакавіка афіцыйна зняло абмежаванні з “Беларуськалія” і Беларускай калійнай кампаніі (БКК).

Нягледзячы на ​​рашэнне ЗША пра скасаванне санкцый з “Беларуськалія” пазіцыя афіцыйнага Вільнюса ў гэтым пытанні застаецца ранейшай, заявіў 19 сакавіка Дабравольскас.

Напрыканцы сакавіка Ругінене заявіла, што Вільнюс “можа разгледзець” магчымасць дыялогу з Мінскам на ўзроўні намеснікаў міністраў замежных спраў пры выкананні шэрагу ўмоў: спынення кантрабанды цыгарэт з дапамогай метэазондаў; вяртання ў краіну грузавікоў літоўскіх перавозчыкаў “без якіх-небудзь дадатковых збораў або штрафаў”; спынення міграцыйнага крызісу на мяжы.

Пры гэтым прэм’ер падкрэсліла, што “ніколі ні на якім узроўні” не абмяркоўвала са спецпасланнікам прэзідэнта ЗША Джонам Коўлам транзіт угнаенняў з Беларусі — для гэтага “няма ўмоў”, паколькі ў дачыненні да беларускага калію дзейнічаюць санкцыі ЕС.

Перавозка ўгнаенняў праз літоўскую тэрыторыю магчымая толькі пасля прыняцця адпаведнага рашэння “ўсім блокам Еўрасаюза”, дадала палітык.