Беларус-палітуцякач звярнуўся ў польскую пракуратуру ў сувязі з размяшчэннем яго асабістых звестак у мясцовым тэлеграм-канале

Апублікавана на адкрытай версіі “Позірку” 24 траўня 2026 года ў 10:30

20 траўня, Позірк. У месенджары “Тэлеграм” два месяцы таму з’явіўся польскі канал з нацыяналістычнымі лозунгамі. За гэты час невядомыя размясцілі там звесткі пра прыблізна 30 замежнікаў, якія жывуць у Польшчы, частка з іх беларусы, паведаміў “Позірку” актывіст з Беларусі Яўген Карпавец.

Ён сам патрапіў у спіс і звярнуўся па дапамогу да праваабаронцаў і ў пракуратуру.

Паводле слоў Карпаўца, найхутчэй аўтары канала адбіраюць для публікацыі інфармацыю пра тых, каго лічаць прыналежнымі да кам’юніці ЛГБТК+. Пра тое, што ён таксама патрапіў у спіс, актывіст даведаўся ад журналістаў.

“Калі мне даслалі спасылку, я зразумеў, што не ўсе фотаздымкі мае. Увогуле перапіска, якая там вялася нібыта ад майго імя на сайце знаёмстваў, не мая. Гэта не мая логіка, не мой кірунак мыслення. Гэта ўвогуле не я быў”, — распавёў ён.

Пры гэтым некаторыя апублікаваныя звесткі суразмоўца назваў сапраўднымі.

Карпавец пераехаў у Польшчу праз палітычны пераслед на радзіме. Ён не хавае, што гей, і не выключае пераслед як з матыву прыналежнасці да ЛГБТК+, так і з палітычных матываў з боку КДБ. “Гэта больш складаная схема, гібрыдная. Не зразумела, хто ў гэтым зацікаўлены”, — адзначыў актывіст.

Ён назваў сітуацыю досыць непрыемнай і рызыкоўнай для сябе. Адкуль вядоўцы тэлеграм-канала атрымалі ягоныя даныя, невядома, магчыма, ад таго, з кім ён кантактаваў.

“Хацелася б, каб польскія актывісты выказаліся па гэтай сітуацыі, асудзілі тое, што здарылася”, — заявіў Карпавец.

У звароце ў пракуратуру вядзецца пра “падазрэнне ў здзяйсненні злачынства невядомымі асобамі”, якія размясцілі ў “Тэлеграме” ягоныя персанальныя звесткі.

“Гэтыя звесткі былі размешчаныя з мэтай падбухторвання членаў групы да ўжывання гвалту ў дачыненні да асоб з прычыны іх нацыянальнай прыналежнасці, заклікання да нянавісці на глебе нацыянальных адрозненняў, а таксама абразы мяне з прычыны маёй нацыянальнай прыналежнасці, што ўтварае прыкметы злачынстваў, прадугледжаных арт. 119, 256 §1 і 257 КК, а таксама арт. 107 закона Польшчы “Аб абароне персанальных даных”, — паведаміў Карпавец.