Лукашэнка заявіў пра “абсалютную спалучальнасць” эканомік Беларусі і Алжыра

26 траўня, Позірк. Пра “абсалютную спалучальнасць” эканомік Беларусі і Алжыра заявіў 26 траўня Аляксандр Лукашэнка, сустракаючыся ў Мінску са старшынёй Нацыянальнага народнага сходу парламента гэтай паўночнаафрыканскай краіны Ібрагімам Бугалі.

Паводле сцвярджэння спікера, у гэтым ён пераканаўся падчас візіту ў Алжыр у снежні 2025 года. “Мы можам вам прапанаваць тое, чаго ў вас няма. Вы ж у сваю чаргу можаце нам дапамагчы ў развіцці тых напрамкаў, у якіх мы маем патрэбу”, — развіў сваю думку беларускі палітык.

Лукашэнка заклікаў суразмоўцу “душой і сэрцам адчуць”, што ў Беларусі жывуць “не чужыя алжырцам людзі”. “Мы абсалютна адкрытыя для вашай краіны і вельмі хацелі б мець з вамі прасунутыя, самыя сур’ёзныя стасункі. Можа, самыя лепшыя з усіх краін Афрыкі”, — сказаў ён.

Паводле інфармацыі прэс-службы Лукашэнкі, кіраўнік ніжняй палаты алжырскага парламента ў сваю чаргу заявіў, што яго краіна “мае патрэбу ў беларускім досведзе” па ўмацаванні сельскай гаспадаркі, прамысловасці, фармацэўтыкі.

Нягледзячы на ​​гучныя заявы палітыкаў і згаданы Лукашэнкам візіт, абедзве краіны не маюць амбасадаў на тэрыторыі адна адной і акрэдытаваныя толькі на ўзроўні амбасадараў па сумяшчальніцтве.

Паводле інфармацыі беларускіх дзяржСМІ, Бугалі на сустрэчы з Лукашэнкам заявіў, што Алжыр і Беларусь разглядаюць магчымасць адкрыць амбасады і арганізаваць прамыя авіязносіны паміж краінамі.

Лукашэнка наведваў Алжыр у снежні 2025 года — паміж пералётамі ў Аман. Пасля перагавораў з алжырскім прэзідэнтам Абдэльмаджыдам Тэбунам госць заявіў пра дасягнутую дамоўленасць давесці тавараабарот з Алжырам да 500 млн долараў. Пры гэтым прэс-служба візіцёра прыводзіла статыстыку двухбаковага гандлю, паводле якой па выніках 2024 года ўзаемны тавараабарот склаў “крыху больш за 49 млн долараў, з якіх практычна ўвесь аб’ём — гэта беларускі экспарт”.

Дыпламатычныя стасункі паміж Беларуссю і Алжырам усталяваныя 24 кастрычніка 1995 года.

На сайце беларускай амбасады ў Егіпце, якая курыруе ў тым ліку стасункі з Алжырам, апошнія даныя па тавараабароце састарэлі на пяць гадоў. Яны паказвалі на рэзкае падзенне і мізэрныя аб’ёмы двухбаковага гандлю — з 13,2 млн долараў у 2020 годзе да 1,01 млн у 2021-м (у абодвух выпадках — толькі беларускі экспарт).

Асноўныя экспартныя пазіцыі Беларусі на той момант: калійныя ўгнаенні, тэкстыльныя матэрыялы, прасякнутыя ці пакрытыя пластмасамі, папера газетная, канцылярскія вырабы.