Па факце смяротнага здарэння ў шахце “Беларуськалія” заведзеная крымінальная справа
12 чэрвеня, Позірк. Па факце смяротнага здарэння ў шахце “Беларуськалія” ўзбуджаная крымінальная справа паводле ч. 2 арт. 303 КК (парушэнне правілаў бяспекі горных або будаўнічых работ, якое прывяло з неасцярожнасці да смерці чалавека), паведаміла 12 чэрвеня прэс-служба Следчага камітэта.
Паводле звестак следства, у выніку інцыдэнту загінуў 50-гадовы мацавальнік рудніка. Траўмавана два чалавекі: 34-гадовы трактарыст участка атрымаў цяжкія цялесныя пашкоджанні; 18-гадовы навучэнец каледжа, які праходзіць навучальную практыку на рудніку, — пашкоджанні нагі. Пацярпелыя шпіталізаваныя.
Адзначаецца, што следча-аператыўная група агледзела месца здарэння, зафіксавала следавую карціну, дапытала сведкаў і прызначыла шэраг экспертных даследаванняў. Вынятая дакументацыя, у тым ліку па датрыманні тэхнікі бяспекі і ахове працы.
Пра няшчасны выпадак са смяротным вынікам, які здарыўся 11 чэрвеня на рудніку 3-га рудаўпраўлення “Беларуськалія”, прадпрыемства паведаміла на наступны дзень пасля здарэння.
