12 чэрвеня, Позірк. V канферэнцыя “Новая Беларусь” будзе прысвечаная “абмеркаванню змяненняў, якія адбыліся за апошні час, асэнсаванню таго, хто і як дапамагае беларусам і Беларусі, аналізу перспектыў развіцця сітуацыі ў рэгіёне і вызначэнню месца беларускіх дэмакратычных сіл, беларусаў і Беларусі ў гэтых працэсах”. Пра гэта заявіла ў сваім тэлеграм-канале дэмакратычны лідар Святлана Ціханоўская.
Палітык прапанавала беларусам да 15 чэрвеня запоўніць спецыяльную форму, у якой выказаць меркаванне аб тым, якія пытанні і тэмы варта абмеркаваць на канферэнцыі, каб дапамагчы “сфарміраваць праграму мерапрыемства”.
V канферэнцыя “Новая Беларусь” пройдзе ў Варшаве 8–9 жніўня.
IV канферэнцыя “Новая Беларусь” прайшла 9–10 жніўня 2025-га таксама ў Варшаве. Пасля першага дня працы мерапрыемства адбылася вулічная акцыя “Марш Свабоды” да гадавіны выбараў-2020.
На першай канферэнцыі “Новая Беларусь”, якая адбылася ў 2022 годзе ў Вільнюсе, Ціханоўская абвясціла пра стварэнне АПК, прызначыла яго прадстаўнікоў.
На другім форуме ў 2023 годзе ў Варшаве палітык зрабіла пэўныя кадравыя змены ў АПК, прадэкларавала імкненне дэмсіл дамагчыся ўступлення Беларусі ў Еўрасаюз.
Падчас трэцяй канферэнцыі ў 2024 годзе ў Вільнюсе сярод іншага была падпісаная “Платформа 2025” — сумесная стратэгія дзеянняў дэмсіл на гэты год.
