У спіс “экстрэмістаў” дададзена 25 чалавек, у тым ліку палітолаг Балкунец і прадстаўнікі ініцыятывы “Сумленныя людзі“

19 чэрвеня, Позірк. 25 чалавек унесла МУС 19 чэрвеня ў спіс асоб, якія маюць дачыненне да “экстрэмісцкай дзейнасці“. Цяпер у адпаведным пераліку на сайце ведамства 6.728 пазіцый.

6 чалавек унесена ў пералік з адзнакай “адбывае пакаранне“, 15 — з адзнакай “судзімасць не пагашаная“, яшчэ 4 — з адзнакай “знаходзіцца ў вышуку“.

“Адбывае пакаранне”, на думку МУС, завочна прыгавораны 25 траўня Мінскім гарадскім судом да 12 гадоў пазбаўлення волі палітолаг Дзмітрый Балкунец. Падставай для ўключэння ў спіс стала вынясенне яму прысуду па артыкулах 357, 361, 361¹, 361⁴, 367, 368, 369 і 369¹ Крымінальнага кодэкса.

Акрамя Балкунца з пазнакай “адбывае пакаранне” ўнесены ў спіс палітвязень Яўген Пяргаеў (асуджаны паводле арт. 361 і 130, тэрмін праваабаронцам невядомы), а таксама Канстанцін Котаў (арт. 361⁴, 367), Глеб Ганчароў (арт. 361⁴, 368), Аляксандр Пархоменка (арт. 361⁴) і Юрый Дашкевіч (арт. 368, 369).

З пазнакай “судзімасць не пагашаная”, якая сведчыць, як правіла, аб вынясенні прысуду, не звязанага з пазбаўленнем волі, у спіс унесеныя Ігар Надзееў, Ігар Зайцаў, Генадзь Чымбур, Раман Булыга, Яўген Бойка, Дзмітрый Аўчынка, Раман Падгорны, Георгій Чавушнік, Алена Юркевіч, Павел Красоўскі, Алег Скрыпнікаў, Данііл Брыкун, Яўген Валынкін, Станіслаў Дзенісевіч і Вольга Марчанка. Усе яны асуджаныя паводле арт. 361⁴ Крымінальнага кодэкса.

“Знаходзяцца ў вышуку“, паводле версіі МУС, унесеныя ў “спіс экстрэмістаў“ прадстаўнікі ініцыятывы “Сумленныя людзі“, завочна асуджаныя ў студзені 2026 года. Падставай для ўключэння ў спіс Алены Жылачкінай (Жываглод), Зарыны Сарокінай, Алега Давыдчыка і Цімафея Малахоўскага стала вынясенне прысуду па артыкулах 130, 361, 361¹, 367, 368 і 369¹ Крымінальнага кодэкса.

Даведка “Позірку”:

арт. 130 Крымінальнага кодэкса — распальванне расавай, нацыянальнай, рэлігійнай альбо іншай сацыяльнай варожасці або варажнечы;

арт. 357 — змова ці іншыя дзеянні, учыненыя з мэтай захопу дзяржаўнай улады;

арт. 361 — заклікі да мер абмежавальнага характару (санкцый) , іншых дзеянняў, накіраваных на прычыненне шкоды нацыянальнай бяспецы Рэспублікі Беларусь;

арт. 361¹ — стварэнне экстрэмісцкага фарміравання альбо ўдзел у ім;

арт. 361⁴ — садзейнічанне экстрэмісцкай дзейнасці;

арт. 367 — паклёп у дачыненні да прэзідэнта, які спыніў выкананне сваіх паўнамоцтваў;

арт. 368 — абраза прэзідэнта, які спыніў выкананне сваіх паўнамоцтваў;

арт. 369 — абраза прадстаўніка ўлады;

арт. 369¹ — дыскрэдытацыя Рэспублікі Беларусь.