З Мінска ў Маскоўскую вобласць везлі ружы, заражаныя небяспечным шкоднікам — кветкі спалілі ў Расіі

23 чэрвеня, Позірк. 350 зрэзаў вырашчаных у Эквадоры руж, што былі заражаныя “небяспечным каранцінным шкоднікам” — заходнім кветкавым трыпсам, выявілі 19 чэрвеня ў пункце санітарнага кантролю Смаленскай вобласці Расіі, якая мяжуе з Беларуссю, паведаміла Федэральная служба РФ па ветэрынарным і фітасанітарным наглядзе.

Адзначаецца, што кветкі везлі ў аўтамабілі з Мінска ў Маскоўскую вобласць. Каб не дапусціць распаўсюду шкодніка, у той жа дзень расліны былі спаленыя ў месцы выяўлення. Перавозчыку заражаных кветак “абвешчаная перасцярога пра недапушчэнне парушэння фітасанітарных патрабаванняў”.

Паводле інфармацыі Рассельгаснагляду, заходні кветкавы трыпс (Frankliniella occidentalis Perg.) шкодзіць усім гароднінным і большасці дэкаратыўна-кветкавых культур. Можа жыць ва ўсіх без выключэння кветках. Заселеныя імі лісце і кветкі хутка вянуць і ападаюць. Пашкоджанне кветкавых пупышак выклікае дэфармацыю кветак і пладоў.

Заходні кветкавы трыпс не ёсць небяспечным для чалавека, але можа несці пагрозу для харчовай бяспекі, бо пераносіць вірусныя захворванні раслін.