Частка апошніх памілаванных была прыгаворана да абмежавання волі, тэрміны падыходзілі да канца — праваабаронцы

6 ліпеня, Позірк. Як мінімум частка з памілаваных 1 ліпеня — людзі, прыгавораныя па палітычных матывах да абмежавання волі без накіравання у папраўчую ўстанову адкрытага тыпу, паведаміў праваабарончы цэнтр “Вясна”.

Паводле яго інфармацыі, у большасці з іх прызначаныя тэрміны пакарання “і так падыходзілі да сканчэння”.

1 ліпеня Аляксандр Лукашэнка распарадзіўся памілаваць 32 чалавек, 28 былі асуджаныя за “злачынствы экстрэмісцкай накіраванасці”. Імёна не прыводзіліся

Дакумент быў прымеркаваны да Дня Незалежнасці (3 ліпеня).

Было вызвалена 20 жанчын і 12 мужчын. Ці былі яны прызнаныя палітычнымі зняволенымі, невядома.

На 6 ліпеня ў спісе палітвязняў, які вядзе “Вясна”, 856 чалавек.