Рамонт дарогі ў пункце пропуску Беняконі працягнецца да 23 ліпеня

9 ліпеня, Позірк. Рамонт дарожнага пакрыцця ў пункце пропуску Беняконі (з літоўскага боку — Шальчынінкай) працягнецца да 23 ліпеня, паведаміла 9 ліпеня прэс-служба Дзяржаўнага пагранічнага камітэта.

“Рух транспартных сродкаў будзе арганізаваны па асобных палосах праезнай часткі”, — папярэдзіла ведамства, заклікаўшы кіроўцаў “трымацца часовай схемы арганізацыі дарожнага руху і выконваць патрабаванні дарожных знакаў”.

Дзяржпагранкамітэт рэкамендаваў улічваць гэтую інфармацыю і выбіраць “альтэрнатыўныя маршруты накірунку”.

12 чэрвеня пагранічная служба заяўляла, што рамонт дарожнага пакрыцця працягнецца да 30 чэрвеня.

Дзяржаўны мытны камітэт раней паведамляў, што планавы рамонт асфальтабетоннага пакрыцця ў пункце Беняконі будзе праводзіцца толькі два дні — 12 і 13 чэрвеня. 25 чэрвеня, паводле інфармацыі ведамства, у пункце распачалося аднаўленне цэментнага пакрыцця радыеметрычных варот на выездзе з Беларусі.

Максімальная колькасць транспарту, які за суткі можа перасекчы мяжу праз гэты пункт у адным кірунку, — 390 легкавых і 250 грузавых аўто.