Амбасада Беларусі ў Польшчы амаль на два тыдні прыпыніла выдачу пасведчанняў на вяртанне

16 ліпеня, Позірк. Выдача пасведчання на вяртанне ў краіну ў консульскім аддзеле амбасады Беларусі ў Польшчы прыпынена з 16 па 27 ліпеня, вынікае з інфармацыі на сайце дыппрадстаўніцтва.

Гэта адбываецца “па тэхнічных прычынах”.

У амбасадзе просяць “з разуменнем паставіцца да дадзенай акалічнасці” і рэкамендуюць у экстраных выпадках звяртацца па пасведчанне ў “іншыя бліжэйшыя замежныя ўстановы Рэспублікі Беларусь на тэрыторыі Польшчы і ў суседніх краінах”.

Консульствы Беларусі ў Польшчы працуюць у Беластоку і Бяла-Падляску (Люблінскае ваяводства).

Пасведчанне на вяртанне — дакумент, які выдаецца ў выпадку страты, крадзяжу або заканчэння тэрміну дзеяння пашпарта для аднаразовага ўезду ў Беларусь.

Для яго атрымання ў Польшчы трэба звяртацца ў консульскі аддзел дыпмісіі ў Варшаве.

У выпадку крадзяжу або страты пашпарта ў амбасаду трэба прынесці даведку з польскай паліцыі, якая пацвярджае падачу туды адпаведнай заявы.

Пасведчанне на вяртанне выдаецца на тэрмін, неабходны для ўезду ў Беларусь (як правіла да 14 дзён).