У “спіс экстрэмістаў” дададзена 22 чалавекі

17 ліпеня, Позірк. Міністэрства ўнутраных спраў 17 ліпеня ўключыла яшчэ 22 чалавекі ў спіс “асобаў, якія маюць дачыненне да экстрэмісцкай дзейнасці“. Цяпер у пераліку на сайце ведамства 6.794 пазіцыі.

Шэсць чалавек унесена ў пералік з паметкай “адбывае пакаранне“: Аляксандр Яжэўскі (арт. 14, 356 КК), Уладзімір Карчэўны (369¹, 361, 368), Сяргей Шах (368), грамадзянін Беларусі, які жыве ў Польшчы, Юрый Трашчынскі (361¹), Андрэй Печань (361⁴) і Аляксей Пасека (130, 368).

З пазнакай “судзімасць не пагашаная” згадана 16 чалавек: грамадзянін Расіі Анатоль Вайцяхоўскі (361, 367, 368, 361⁴), Аляксей Бальшакоў і Павел Цімохін (абодва — 368) і асуджаныя па арт. 361⁴ Ілля Дуброўскі, Дзяніс Ягораў, Арцём Астратаў, Мацвей Сіняўскі, Рыгор Севасцьян, Сяргей Яскавец, Сяргей Цупа, Ангеліна Грузінская, Максім Кісель, Аляксандр Паповіч, Валерый Куратчык, Віктар Зелянеўскі і Кацярына Жогаль.

Даведка “Позірку”:

арт. 14 Крымінальнага кодэкса — замах на злачынства;

130 — распальванне расавай, нацыянальнай, рэлігійнай альбо іншай сацыяльнай варожасці або варажнечы;

356 — здрада дзяржаве;

361 — заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы Рэспублікі Беларусь;

361¹ — стварэнне экстрэмісцкага фарміравання альбо ўдзел у ім;

361⁴ — садзейнічанне экстрэмісцкай дзейнасці;

367 — паклёп на прэзідэнта;

368 — абраза прэзідэнта;

369¹ — дыскрэдытацыя Рэспублікі Беларусь.