З беларускіх шахматыстаў знятыя санкцыйныя абмежаванні
21 ліпеня, Позірк. Міжнародная шахматная федэрацыя (FIDE) паведаміла аб зняцці санкцыйных абмежаванняў з беларускіх спартсменаў і нацыянальнай федэрацыі (БШФ).
Адзначаецца, што беларусы змогуць зноў удзельнічаць у спаборніцтвах, у тым ліку камандных, з выкарыстаннем дзяржаўнай сімволікі.
Рашэнне, як паведамляецца, прынята з улікам адпаведных рэкамендацый Міжнароднага алімпійскага камітэта (МАК).
Першымі буйнымі турнірамі, на якіх беларускія шахматысты выступяць з дзяржсімволікай, стануць Шахматная алімпіяда для асоб з абмежаванымі магчымасцямі і Сусветная шахматная алімпіяда. Гэтыя спаборніцтвы пройдуць у 2026 годзе.
28 лютага 2022 года FIDE дазволіла расіянам і беларусам удзельнічаць у турнірах пад сваёй эгідай у нейтральным статусе і наклала забарону на правядзенне спаборніцтваў на тэрыторыі дзвюх краін.
22 верасня 2024 года стала вядома, што FIDE пакінула дзейнымі санкцыі ў дачыненні да расійскіх і беларускіх спартоўцаў.
У той жа дзень, праз некалькі дзён пасля пачатку вайны ва Украіне, МАК заклікаў спартыўныя федэрацыі не дапускаць да спаборніцтваў пад сваёй эгідай атлетаў з РФ і Беларусі. Гэтая рэкамендацыя была неадкладна і масава прынята да выканання, у выніку чаго расійскі і беларускі спорт аказаўся амаль у поўнай ізаляцыі.
28 сакавіка 2023 года МАК выпусціў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у міжнародных спаборніцтвах у якасці індывідуальных нейтральных спартсменаў, без адпаведнай дзяржаўнай сімволікі.
7 ліпеня 2026 года МАК зняў усе абмежаванні з Расіі і аднавіў у правах краінавы алімпійскі камітэт. За два месяцы да гэтага, 7 траўня, выканкам МАК заявіў, што “больш не рэкамендуе якія-небудзь абмежаванні на ўдзел беларускіх спартсменаў, уключаючы каманды, у спаборніцтвах, якія праводзяцца міжнароднымі федэрацыямі і арганізатарамі міжнародных спартовых мерапрыемстваў”.
Пасля гэтага пра допуск беларускіх спартсменаў на свае спаборніцтвы на роўных умовах з прадстаўнікамі іншых краін заявілі аб’яднанні па каратэ, гімнастыцы, фехтаванні, веласпорце, спартыўных танцах, більярдзе, водных лыжах, боксе, тайскім боксе, сучасным пяцібор’і, валейболе, гандболе, парусным спорце, барацьбе, цяжкай атлетыцы, а таксама Міжнародная федэрацыя студэнцкага спорту, пад эгідай якой у 2027 годзе адбудуцца летняя і зімовая ўніверсіяды.
Пры гэтым захаваны абмежаванні адносна лёгкаатлетаў, тэнісістаў, біятланістаў і прадстаўнікоў шэрага іншых відаў спорту.
