У Беларусі пабудавана менш за траціну запланаваных да 1 кастрычніка прафілакторыяў для цялят
3 жніўня, Позірк. У Беларусі пабудаваны 161 прафілакторый для цялят з 528 запланаваных, заявіў міністр сельскай гаспадаркі і харчавання Юрый Горлаў 3 жніўня Аляксандру Лукашэнку, паведамляе прэс-служба апошняга.
Згодна з пастановай Савета міністраў № 126 ад 18 сакавіка 2026 года, усе аб’екты маюць быць гатовыя да 1 кастрычніка. Такім чынам, праз 4,5 месяца пасля прыняцця рашэння і за 2 месяцы да вызначанага тэрміну выканана 30,5% плана.
Да пачатку другога месяца восені, апрача непасрэдна будаўніцтва прафілакторыяў, мае быць уведзенае ў эксплуатацыю ўсё неабходнае тэхналагічнае абсталяванне.
26 красавіка ў Петрыкаўскім раёне (Гомельская вобласць) Лукашэнка звярнуў увагу падначаленых на тое, што ў Беларусі маецца “вялікая колькасць драўніны”, якая “часам проста парахнее”.
Палітык выказаў меркаванне, што гэты рэсурс мог бы быць выкарыстаны ў тым ліку для будаўніцтва згаданых аб’ектаў: “Ён (прафілакторый. — “Позірк“.) прастаіць на 20% менш паводле тэрміну, чым металічны, але пабудуем новы”.
Лукашэнка падкрэсліў, што за ўласныя сродкі гаспадаркі могуць будаваць “палацы” для цялят. “Калі за свае грошы, я буду вітаць дарагія “палацы” для гэтых малых”, — сказаў ён.
Пагалоўе буйной рагатай жывёлы (БРЖ; каровы, быкі ды інш.) на 1 ліпеня 2026 года склала 3.841.107 галоў — на 3,2% менш, чым на аналагічную дату 2025 года (3.970.080), паказаў праведзены “Позіркам” аналіз даных Нацыянальнага статыстычнага камітэта.
Негатыўная дынаміка колькасці БРЖ адзначалася ва ўсіх рэгіёнах:
- Брэсцкая вобласць — 844.972 (годам раней — 853.191; -1%);
- Віцебская — 430.169 (480.897; -10,5%);
- Гомельская — 549.725 (582.992; -5,7%);
- Гродзенская — 674.328 (677.865; -0,5%);
- Мінская — 890.186 (902.751; -1,4%);
- Магілёўская — 451.727 (472.384; -4,4%).
Агулам па краіне колькасць кароў скарацілася да 1.347.792 (1.368.245; -1,5%):
- Брэсцкая вобласць — 301.616 (300.821; +0,3%);
- Віцебская — 151.838 (166.329; -8,7%);
- Гомельская — 189.771 (195.234; -2,8%);
- Гродзенская — 223.775 (223.615; +0,1%);
- Мінская — 320.976 (320.754; +0,1%);
- Магілёўская — 159.816 (161.492; -1%).
Пагалоўе БРЖ на канец 2025 года склала 3.900.272 галоў — на 3% менш, чым было годам раней (4.020.428).
Згодна з аналізам “Позірку“, зніжэнне пагалоўя БРЖ адзначаецца з пачатку 2019 года, калі ў краіне налічвалася 4 млн 336,7 тыс. галоў. На пачатак 2020 года іх было 4 млн 290,8 тыс., 2021-га — 4 млн 287,7 тыс., 2022-га — 4 млн 232,4 тыс., 2023-га — 4 млн 209,3 тыс., 2024-га — 4 млн 197,1 тыс., 2025-га — 4 млн 97,9 тыс.
Лукашэнка быў абраны прэзідэнтам у ліпені 1994 года. На пачатак 1995-га пагалоўе БРЖ у краіне складала 5 млн 403,3 тыс.
Такім чынам, за час яго кіравання пагалоўе скарацілася больш як на чвэрць (-28,9%).
