17 жніўня, Позірк. У полі каля вёскі Шэметава Смаргонскага раёна (Гродзенская вобласць) з-за дзіцячай гульні з запалкамі 15 жніўня згарэла 450 т саломы, паведамляе Следчы камітэт.
Паводле звестак ведамства, 9-гадовы хлопчык знайшоў пачак запалак і падпаліў сцірту саломы. Агонь стаў хутка распаўсюджвацца. Калі ў дзіцяці патушыць узгаранне самастойна не атрымалася, ён уцёк, не паведаміўшы дарослым аб тым, што адбылося.
Салома, што згарэла, належала мясцоваму сельскагаспадарчаму прадпрыемству. Шкода склала больш за 12 тыс. рублёў.
“У сувязі з тым, што малалетні не дасягнуў узросту наступлення крымінальнай адказнасці, матэрыяльны ўрон, прычынены яго дзеяннямі, у поўным аб’ёме трэба будзе пакрыць бацькам дзіцяці“, — адзначае СК.
Ведамства падкрэслівае, што дзіцячыя гульні з агнём, падпал сухой травы або саломы штогод становяцца прычынай маштабных пажараў: агонь за лічаныя хвіліны ахоплівае гектары сухой расліннасці, знішчае жылыя дамы, дачы, сельскагаспадарчыя ўгоддзі, лясныя масівы і дарагую тэхніку.
