Урад уводзіць абавязковую маркіроўку плаўленых і тварожных сыркоў
19 жніўня, Позірк. Аб увядзенні з 1 сакавіка 2027 года абавязковай маркіроўкі плаўленых і тварожных сыркоў паведаміў 19 жніўня ўрад.
Адпаведную пастанову падпісаў прэм’ер-міністр Аляксандр Турчын.
Адзначаецца, што маркіроўцы сродкамі ідэнтыфікацыі будуць падлягаць “асобныя віды малочных прадуктаў і сыроў (сыркоў тварожных, тварожных вырабаў, сыроў плаўленых і іншых відаў малочных прадуктаў)”.
26 верасня 2025 года паведамлялася, што прадукты харчавання выключаны з пераліку тавараў, звесткі аб абароце якіх з’яўляюцца прадметам адсочвання. Гэта прадугледжвалася пастановай Савета міністраў № 528.
Пад скарачэнне тады таксама патрапілі абутак і бытавая хімія.
Дакумент прадугледжваў перанос тэрміну ўвядзення адсочвання бытавой тэхнікі (машыны пральныя бытавыя, пыласосы, робаты-пыласосы бытавыя, прасы электрычныя, камбайны кухонныя бытавыя, машыны посудамыйныя бытавыя, чайнікі электрычныя, мульціваркі электрычныя, печы мікрахвалевыя, пліты (варачныя панэлі) бытавыя электрычныя, дрэлі электрычныя, фены для валасоў, тэлевізары) з 1 кастрычніка 2025-га на 1 сакавіка 2026-га.
Таксама з 1 кастрычніка на 1 траўня 2026-га былі перанесеныя тэрміны ўвядзення маркіроўкі сродкамі ідэнтыфікацыі безалкагольных напояў і сокаў. Захоўвалася маркіроўка гэтых тавараў уніфікаванымі кантрольнымі знакамі ў перыяд да 30 красавіка 2026-га.
З пераліку тавараў, якія падлягаюць маркіроўцы сродкамі ідэнтыфікацыі, выключаныя мабільныя тэлефоны і ноўтбукі, якія былі ва ўжыванні.
Акрамя таго, 25 верасня была прынятая сумесная пастанова ўрада і Нацыянальнага банка № 529/24, якой прадугледжаныя некаторыя дадатковыя правы суб’ектам гаспадарання.
Гаворка ішла аб маркіроўцы тавараў, што рэалізуюцца на тэрыторыі сельскай мясцовасці і ў гандлёвых аб’ектах з гандлёвай плошчай менш за 200 квадратных метраў.
Да 1 сакавіка 2029 года суб’екты могуць не весці дыферэнцыраваны ўлік; не перадаваць у сістэму кантролю касавага абсталявання інфармацыю аб рэалізацыі маркіраваных тавараў, а таксама прадаваць медработнікам у сельскай мясцовасці, у якой адсутнічаюць аптэкі, медвырабаў і тавараў аптэчнага асартыменту без выкарыстання касавага абсталявання.
Указам Аляксандра Лукашэнкі № 378 ад 21 кастрычніка 2025 года ў Беларусі таксама ўведзеная абавязковая маркіроўка ювелірных вырабаў. Дакумент уступіў у сілу 1 студзеня 2026-га.
