Мілінкевіча пахаваюць на вайсковых могілках у Варшаве
19 жніўня, Позірк. Пахаванне палітыка і грамадскага дзеяча Аляксандра Мілінкевіча пройдзе 22 жніўня ў Варшаве на вайсковых могілках “Павонзкі”, паведаміла яго жонка Іна Кулей.
Развітанне адбудзецца ў той жа дзень у польскай сталіцы. У 10 гадзін труна будзе выстаўлена у Архікафедральным саборы св. Яна Хрысціцеля ў Старым горадзе. Праз дзве гадзіны там жа пачнецца памінальная імша.
Пахаванне запланавана на 15 гадзін.
Вайсковыя могілкі “Павонзкі” (Cmentarz Wojskowy na Powązkach) былі заснаваныя ў 1912 годзе як аб’ект рускага ваеннага гарнізона і сталі пасля 1918-га польскім ваенным некропалем. На сёння — найбольш вядомыя могілкі Варшавы.
Там ляжаць шматлікія дзяржаўныя і палітычныя дзеячы, паэты, мастакі, навукоўцы і прадстаўнікі культуры.
Аляксандр Мілінкевіч памёр 11 жніўня ва ўзросце 79 гадоў.
Мілінкевіч нарадзіўся ў Гродне ў сям’і заслужанага настаўніка БССР. У 1965 годзе з выдатнай адзнакай скончыў школу, у 1969-м — фізіка-матэматычны факультэт Гродзенскага педагагічнага інстытута.
Пасля заканчэння аспірантуры Інстытута фізікі АН БССР працаваў малодшым навуковым супрацоўнікам. У 1976-м абараніў дысертацыю па тэме “Механізм генерацыі звышмагутных лазерных імпульсаў”.
Быў школьным настаўнікам, выкладчыкам у ВНУ (у т.л. Алжыра), намеснікам кіраўніка Гродзенскага гарвыканкама. Прайшоў стажыроўку ва ўніверсітэтах Польшчы, ЗША Францыі, вывучаў сучасныя метады адукацыі ў Вялікабрытаніі і досвед развіцця спорту ў Канадзе.
Аўтар 65 навуковых прац і манаграфій па квантавай электроніцы, лазернай тэхніцы, а таксама па гісторыі, культуры, адукацыі, архітэктуры Беларусі.
У кастрычніку 2005 года на Кангрэсе дэмакратычных сіл быў абраны адзіным кандыдатам ад апазіцыі на прэзідэнцкіх выбарах 19 сакавіка 2006-га. Сабраў больш за 250 тыс. подпісаў выбаршчыкаў.
Паводле афіцыйных звестак Цэнтрвыбаркама, набраў 6,12% галасоў.
Удзельнічаў у паслявыбарных пратэстах, адбыў палітычна матываваны адміністрацыйны арышт.
У 2006–2016 гадах быў лідарам руху “За Свабоду”.
У 2017 годзе разам з пісьменніцай Святланай Алексіевіч і іншымі вядомымі людзьмі зарэгістраваў у Варшаве фонд “Вольны беларускі ўніверсітэт”, з’яўляўся яго кацлерам.
26 кастрычніка 2006-га ўзнагароджаны штогадовай прэміяй імя Сахарава “За свабоду думкі”, заснаванай Еўрапарламентам у 1988 годзе.
У апошнія гады Мілінкевіч жыў за мяжой. Быў пазаштатным дарадцам дэмакратычнага лідара Святланы Ціханоўскай.
25 лістапада 2025 года Кулей паведаміла, што муж трапіў у рэанімацыю ў вельмі цяжкім стане. Перад гэтым палітык перанёс аперацыю па стэнціраванні соннай артэрыі, якая на 80% была зачынена тромбам. Пасля яго выдалення і аднаўленні крывацёку рэзка падняўся ціск. Ён быў уведзены ў медыкаментозны сон, каб арганізм не марнаваў сілы на рухі.
Пазней Мілінкевіч быў пераведзены ў аддзяленне інтэнсіўнай тэрапіі.
26 траўня Кулей звярнулася да таварыства з просьбай аказаць фінансавую дапамогу палітыку. Яна адзначыла, што наступствы лістападаўскай аперацыі “апынуліся не такімі, як мы ўсе спадзяваліся”. Сума, запытаная на рэабілітацыю ў Варшаве — каля 120 тыс. злотых (больш за 30 тыс. долараў), была сабраная за некалькі дзён.
Рэквіем па Мілінкевічу: Беларускі Гавел, якога будзе не хапаць
Вестка пра смерць Аляксандра Мілінкевіча стала шокам для беларускага дэмакратычнага руху. Нягледзячы на цяжкую хваробу, апошнім часам з сям'і палітыка і грамадскага дзеяча паступалі сігналы, якія абнадзейвалі, — ён праходзіў рэабілітацыю пасля складанай аперацыі. І вось сёння раніцай стала вядома …
Еўрапейскія палітыкі і арганізацыі працягваюць выказваць спачуванні з нагоды смерці Аляксандра Мілінкевіча
12 жніўня, Позірк. "Нязломным лідарам беларускіх дэмакратычных сіл" назваў памерлага 11 жніўня палітыка і грамадскага дзеяча Аляксандра Мілінкевіча прэс-сакратар Міністэрства замежных спраў Польшчы Мацей Вевюра. Асобна Вевюра адзначыў, што з 2020 года Мілінкевіч знаходзіўся ў эміграцыі ў Польшчы, дзе стаз …
