Над Гомелем, верагодна, зноў лёталі беспілотнікі РФ — “Флагшток”

20 жніўня, Позірк. Пра “страшны трэск і грукат” раніцай 20 жніўня паведамілі ў сацыяльных сетках жыхары Гомеля, піша рэгіянальны сайт “Флагшток”.

Адзначаецца, што гэта адбылося прыкладна а 05:25.

Паводле словаў відавочцаў, якія перадае СМІ, гукі былі падобныя на “пралёт дрона і выбух, альбо пралёт знішчальніка”. Іх чулі жыхары дамоў на вул. Кажара ў раёне Стары Аэрадром, а таксама ў суседняй Валатаве і Старой Валатаве.

Украінскія СМІ паведамілі аб адной з самых магутных атак на Кіеў у ноч на 20 жніўня, у выніку якой загінула больш за 10 і паранена больш за 30 чалавек. Жыхары ўсходніх рэгіёнаў Польшчы атрымалі ноччу паведамленні ад Урадавага цэнтра бяспекі (СМС-апавяшчэнне) аб трывозе ў сувязі з паветранай атакай РФ па Украіне.

18 жніўня “Флагшток” паведамляў аб падзенні ў раёне Беларускага металургічнага завода ў Жлобіне невядомага беспілотніка. У выніку гэтага, як адзначалася, “адбылася дэтанацыя баявой часткі”. Гук выбуху чулі ў суседніх з прадпрыемствам мікрараёнах. Праваахоўнікамі быў закрыты рух па вул. Прамысловай. Афіцыйна інфармацыя не пацвярджалася.

Да гэтага пра падобныя інцыдэнты ў небе гамяльчане і жыхары некаторых іншых раёнаў вобласці паведамлялі 14 жніўня.

19 чэрвеня прэзідэнт Украіны Уладзімір Зяленскі даў Аляксандру Лукашэнку тыдзень на зняцце з вышак рэтранслятараў для навядзення расійскіх дронаў уздоўж мяжы з Украінай: “Калі ён гэта не зробіць, зробім мы”. Палітык таксама заклікаў спыніць пастаўку нафтапрадуктаў расійскага войска.

На наступны дзень у звароце да суайчыннікаў ён заявіў, што Украіне вядома “пра чатыры такія рэтранслятары ў Беларусі — у Гомельскай і Брэсцкай абласцях”, і паўтарыў, што ў Беларусі “ёсць час, каб дэмантаваць гэтае абсталяванне”.

24 чэрвеня Зяленскі паведаміў, што абсталяванне спыніла працу двума днямі раней: “Дэмантавалі [рэтранслятары] ці не, я, шчыра кажучы, пакуль не ведаю. Але мы працуем над гэтым, і я вельмі ўважліва сачу і штодзённыя даклады атрымліваю. Факт, што рэтранслятары на сёння не працуюць”.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны.