29 жніўня, Позірк. Партыю прадукцыі замежнай вытворчасці, якая была незаконна ўвезеная на тэрыторыю Еўразійскага эканамічнага саюза, выявілі супрацоўнікі Гродзенскай рэгіянальнай мытні.
Паводле інфармацыі прэс-службы Дзяржаўнага мытнага камітэта, больш за 47 тыс. адзінак тавараў (адзенне, аўтазапчасткі, музычнае абсталяванне ды інш.) коштам звыш 1 млн рублёў (каля 330 тыс. долараў) знаходзілася ў грузавіку “Івека” з прычэпам, які мытнікі спынілі “пры правядзенні спецыяльнага мерапрыемства”.
“На партыю тавараў, што прыбыла ў Беларусь з Расіі, у кіроўцы беларускай фірмы-перавозчыка не было ніякіх дакументаў, у тым ліку тых, што пацвярджаюць мытнае афармленне пры іх перамяшчэнні на тэрыторыю ЕАЭС”, — канстатавала ведамства.
У дачыненні да перавозчыка распачаты адміністрацыйны працэс паводле арт. 13.12 КаАП (парушэнне парадку набыцця, захоўвання, выкарыстання ў вытворчасці, транспартавання, водпуску і рэалізацыі тавараў). Санкцыя паводле гэтага артыкула для юрыдычных асоб — штраф да 50% кошту “прадмета адміністрацыйнага правапарушэння, сумы выручкі, атрыманай ад рэалізацыі тавараў”.
