1 верасня, Позірк. У Дзень ведаў дэмакратычны лідар Святлана Ціханоўская ў звароце да школьнікаў, студэнтаў, настаўнікаў і бацькоў, падзякавала настаўнікам, “якія пад ціскам ідэалогіі працягваюць вучыць дзяцей думаць“.
“Я ведаю, што прыйдзе час, калі беларуская школа зноў будзе месцам ведаў, развіцця і свабоды, а не страху і ідэалогіі. Бо тое, якую адукацыю атрымліваюць нашыя дзеці сёння, вызначае, якой будзе Беларусь заўтра“, — цытуе палітыка яе прэс-служба.
У сваю чаргу, Аляксандр Лукашэнка ў віншаванні з 1 верасня заклікаў настаўнікаў быць “прыкладам патрыятызму, мужнасці і любові“: “Перакананы, толькі разам мы зможам выхаваць адукаваную і разумную моладзь, гатовую працаваць на карысць Беларусі і абараняць яе, калі спатрэбіцца“.
Ідэалагізацыя і мілітарызацыя адукацыі ўзмацнілася ў Беларусі пасля 2020 года. Сфера стала полем для масавых палітычных рэпрэсій.
