Беларусы часцей за іншых трапляюцца літоўскім памежнікам з падробленымі правамі кіроўцы

1 верасня, Позірк. Грамадзяне Беларусі часцей за іншых выкарыстоўвалі падробленыя пасведчанні кіроўцы, выяўленыя памежнікамі Літвы ад пачатку 2026 года, паведаміла 1 верасня Служба аховы дзяржаўнай мяжы (САДМ) пры МУС краіны.

Адзначаецца, што за восем месяцаў памежнікі выявілі 177 падробленых дакументаў. 52 з іх, ці амаль 30%, былі пасведчаннямі кіроўцы.

На грамадзян Беларусі прыпала 15 такіх выпадкаў (амаль 29%). Далей ідуць грамадзяне Узбекістана — шэсць, Латвіі і Украіны — па пяць, Малдовы — чатыры, Філіпін і Літвы — па тры, Казахстана і Турцыі — па два. Яшчэ па адным падробленым вадзіцельскім пасведчанні прад’явілі грамадзяне сямі іншых краін.

Адзначаецца, што беларусы таксама лідзіравалі па колькасці выяўленых падробленых правоў кіроўцы летась. Тады САДМ зафіксавала 97 такіх выпадкаў з 245 выпадкаў выкарыстання падробленых дакументаў. На грамадзян Беларусі прыпала 22 падробленыя пасведчанні (22,7%), Украіны — 13, Латвіі — дзевяць.